محمد بركات
انتقد محمد بركات، المشرف العام على المنتخب الأولمبي تصرف عصام الحضري مدرب حراس مرمى المنتخب السابق بعد انتقاله إلى الجهاز الفني لمنتخب سوريا.
وقال بركات في تصريحاته عبر برنامج الريمونتادا على قناة المحور: «تعيين عصام الحضري في منتخب سوريا مفاجأة بالنسبة لنا في اتحاد الكرة».
وأضاف: «امبارح الكابتن عصام الحضري اتصل بالأستاذ خالد سرحان المترجم الخاص بمستر ميكالي مدرب منتخب مصر الأولمبي، وطلب مقابلة مع ميكالي، واتفق بالفعل على مقابلة ميكالي ومعاونيه».
وواصل: «عصام الحضري قال لميكالي إن عنده عرضين مش عرض واحد وعايز يخوض تجربة جديدة وإنه واخد قراره، بعد محادثات مع زوجته، وكان كابتن عصام الحضري واخد قراره، ميكالي وجه له سؤالا، هل اتكلمت مع المسؤولين أو اتكلمت مع محمد بركات كمشرف على المنتخب، قاله ما أنا جايلك عشان تتكلم مع كابتن محمد بركات، عشان تنقل له رغبتي».
وتابع: «الموضوع ده غريب جدا، عصام الحضري رايح لميكالي يقوله كلملي بركات، في ظل عمق العلاقة بيني وبين عصام الحضري، مع إننا على طول بنتكلم، ما ترفع سماعة التليفون وكلمني، الموضوع غريب جدا».
وأوضح: «طلبت إني أقعد مع عصام الحضري لكن بكرة مش انهاردة عشان كنت مرتبط بمواعيد وفوجئت إن انهاردة الاتحاد السوري أعلن بشكل رسمي عن تعيين الحضري».
كما أكد محمد بركات، أن عصام الحضري لم يستأذن أي مسؤول داخل اتحاد الكرة قبل تعيينه في الجهاز الفني لمنتخب سوريا.
وزاد: «عصام الحضري مستأذنيش أو استأذن أي حد من اتحاد الكرة، قبل ما يمشي من المنتخب الأولمبي».
واختتم: «الشهر الجاي عندنا ماتشين مهمين ضد زامبيا، والحضري مشي في توقيت حاسم، توقيت رحيل عصام الحضري مش كويس، هو قيمة كبيرة وأسطورة من أساطير مصر وأفريقيا على مستوى مركز حراسة المرمى ومحدش ينكر ده، لكن طريقة الرحيل وحشة».
تعليقات الفيسبوك