لاعبة كرة اليد المحترفة بفرنسا مروة عيد: اتصبت بكورونا وخفيت منها
11:13 م | الإثنين 06 يوليو 2020
مروة عيد لاعبة نيس الفرنسي
كشفت المحترفة المصرية مروة عيد عبدالملك، لاعبة فريق نيس الفرنسي لكرة اليد، عن إصابتها بفيروس كورونا المستجد "كوفيد 19" خلال الأسابيع الماضية.
وكتبت "مروة" عبر حسابها على موقع التواصل الإجتماعي "فيس بوك" اليوم الاثنين: "أنا جالي كورونا.. مفيش يا سيدى النهارده الصبح عملنا المسحه وتحليل الأجسام المضاده قبل بداية الموسم زى كل الناس، وفجأة على الساعه 4 العصر.. ألو أيوه أنتي التحليل بتاعك طلع إيجابي مكدبش عليك الدنيا فجأة بقت لونها أسود في عيونى بس قومت اتوضيت وصليت ركعتين شكر لله معرفش الهدوء ده جالى منين الفكره كلها كانت أزاى هاقول لأمى أنا عندى كورونا وأنا في فرنسا لوحدى دى لوحدها موال ده اللى فارقلى".
وتابعت: "مكدبش عليكم إحساس صعب قوى أنك بتواجه شبح العالم كله يأس منه ومحدش عارف يعالجه وأنا مش بالقوة دى اللى يعرفنى كويس يعرف انى بخاف ع نفسى قوى، ساعة زمن عدت عليا وكأنها سنين ما بين أزاى هواجه المرض ده لوحدى فغربة، تليفونات كتير قوى يمين وشمال أسبوعين عزل ومتخرجيش أنتى فين خلى بالك وفجأه طب استنى نتيجه المسحه كمان ساعة هى اللى هتأكد وفجأه شعاع نور بيقولك لا استنى كده ده تحليل أجسام مضادة إيجابية والمسحة الحمدلله سلبية يعنى أنتى كان عندك كورونا وخفيتى منها ودى أجسام مضادة كمية عياط رهيبة عياط فرحة عجيبة".
مروة عيد: إحنا عايشين بستر ربنا
واختتمت المحترفة المصرية، "أحنا حرفياً ملناش يد ف اى حاجه بتحصل لنا احنا عايشين بستر ربنا ولطفه وكرمه ربنا كبير قوى ، يارب متعيشوش الساعه اللى انا عشتها دى خوف ورعب من مجهول ومصير محدش عارفه الحمدلله انا كنت شايله هم امى بس ربنا يبعد عنها وعنكم كل شر ويشفى كل مريض ، الله يخليكم خلى بالكم من نفسكم الخوف من مجهول احساس يقهر ويوجع حافظوا على بيوتكم واهاليكم ربنا ينجينا جميعاً الحمدلله عدت على خير ربنا يشفى كل مريض ويحفظنا ويحفظكم لسه ف العمر باقيه دعواتكم".
تعليقات الفيسبوك