رئيس مجلس الادارة:

د.محمود مسلم

رئيس التحرير:

مصطفى عمار

حوار.. رضا عبد العال: مليش في السحر.. ومش هعمل ممر شرفي للأهلي

12:16 م | الأحد 20 سبتمبر 2020
حوار.. رضا عبد العال: مليش في السحر.. ومش هعمل ممر شرفي للأهلي

رضا عبد العال

بعد أول مباراة له عقب توليه القيادة الفنية لفريق طنطا، أصبح اسم رضا عبد العال الأكثر تداولاً على مواقع التواصل الاجتماعي، حيث شهدت مباراته الأولى أمام إف سي مصر، والتي انتهت بالتعادل السلبي، العديد من المشاهد المثيرة للجدل.

وحرص "الوطن سبورت" على محاورة "عبد العال" ليكشف كواليس أول مباراة له على مقاعد القيادة الفنية لطنطا، ورأيه في العديد من الأحداث المشتعلة على الساحة الرياضية في الوقت الراهن، وإلى نص الحوار..

ما تقييمك للمباراة الأولى في قيادة طنطا؟

أظن أن مصر كلها شافت الماتش، وشافت التغيير في أداء الفريق، مش هو ده الفريق اللي كان بيلعب قبل كده.

وهل ترى أن يومين وقت كاف لتغيير أداء الفريق؟

اشتغلت على اللاعيبة نفسياً، لاعب زي حسين فيصل بقاله فترة ملعبش ولما شوفته، لقيته لاعب جيد وأديتله الفرصة وظهر بمستوى متميز.

وهل تسعى للرد على المشككين في قدراتك التدريبية؟

الناس كانت بتقولي أنت بتطلع في الفضائيات تحلل وتتكلم بس، انزل الملعب وورينا، وأنا أهو بوريهم أن الكورة سهلة، وأن طريقة اللعب اللي بلعب بيها 4 - 1 - 4 - 1 ناجحة.

بلعب بطريقة "الليبرو المقلوب"

ولماذا اخترت تلك الطريقة؟

شايف أن دي الطريقة الأنسب للفريق، بلعب بليبرو مقلوب قدام الـ4 لاعيبة اللي ورا، وفي الهجوم بلعب بـ4 تانيين ورا المهاجم، وده ظهر في تطور الأداء الهجومي للفريق.

ولماذا غيرت الطريقة في الشوط الثاني؟

في الشوط الثاني لعبت بطريقة 4 - 2 - 3 - 1، عشان اللاعيبة تعبت ومجهودها قل، وده طبيعي، إذا كان الأهلي والزمالك بيشحتوا كورة في أول 5 دقايق في الشوط الثاني.

ولماذا حرصت على وجود "شيخ" في غرفة الملابس قبل المباراة؟

محمود الجوهري شخصياً كان بيعمل كده، جبنا شيخ يقرا قرآن في أوضة اللبس ومشي، مليش علاقة بالسحر والكلام اللي اتقال ده.

غرفة الملابس بعيدة والتكييف بايظ.. هو أنا فيا حيل

ولماذا لم تجر محاضرة المباراة داخل غرفة خلع الملابس وأجريتها في الملعب؟

التكييفات باظت، هو ده اللي حصل، إزاي أعمل المحاضرة والدنيا ولعة والأوضة ضيقة، وكمان المسافة بعيدة بين الملعب وغرفة الملابس، هو أنا فيا حيل.

هل تنوي إقامة ممر شرفي للأهلي بعد تتويجه بالدوري؟

لا مش ناوي، كفاية أنهم خدوا الدوري وأتعملهم ممر شرفي من المقاصة، إحنا لسة بدري على ماتشنا.

وهل طنطا قادر على تحقيق نتيجة إيجابية أمام الأهلي والزمالك؟

للأسف إحنا معندناش القماشة أو الخبرة، اللي يقدر بيها اللاعيبة يحققوا نتيجة في مباريات كبيرة زي دي، بس أتمنى.

فيريرا هيهرب تاني لو مسك الزمالك.. وكارتيرون فاشل ومش هيكمل ماتشين مع التعاون

من ترى أنه الأصلح لتدريب الزمالك في الوقت الراهن؟

للأسف الزمالك بيحاول يرضي الجمهور، لكن واحد زي فيريرا دا لا يصلح تماماً، ده هرب قبل كده وهيهرب تاني، لكن أنا شايف أن مدرب زي تاكيس جونياس مدرب وادي دجلة السابق هو الأنسب، مدرب محترم وعارف الدوري المصري وأمله أنه يمسك الأهلي أو الزمالك.

وما تعليقك على ظاهرة هروب المدربين الأجانب من مصر؟

الأخضر قليل الأدب، المدرب بيلاقي نفسه معروض عليه 3 أضعاف عقده ف بيدفع الشرط الجزائي ويخلع.

وهل ترى أن رحيل كارتيرون خسارة للزمالك؟

ده مدرب فاشل، نجح عشان معاه كنز من اللاعيبة إمكانياتهم كبيرة، وأتوقع أن يتم إقالته من التعاون بعد ماتشين تلاتة.

نفسي أضم صالح جمعة وبن شرقي لطنطا.. وطارق حامد غشيم وواخد أكبر من حقه

إذا كان أمامك فرصة لضم لاعب من الأهلي وآخر من الزمالك، فمن تختار؟

صالح جمعة من الأهلي وأشرف بن شرقي من الزمالك.

وهل مازلت ترى أن طريقة طارق حامد لا تصلح؟

هو مغيرش طريقة لعبه، بيمسك ليه من ورا، وكل التحام بإنذار، وبيلعب لورا كتير، وبيعمل فاولات بغشامة، لكن هو معذور كله بيقول ده مسمار، ده معلم، وبياخد أكتر من حقه.

عاشور اتظلم.. والجنايني هيمشي وملوش بصمة

ما تعليقك على الأسماء التالية؟

رئيس الزمالك؟

أحسن رئيس نادي في مصر

محمود الخطيب؟

أحسن لاعب كرة في تاريخ مصر

حسام عاشور؟

اتظلم

أحمد فتحي؟

بيمثل الاحتراف بجد

رمضان صبحي؟

-أحسن لاعب في مصر الأيام الجاية

محمود كهربا؟

لسة مأثبتش نفسه 

عمرو الجنايني؟

هيمشي وملوش بصمة