رئيس مجلس الادارة:

د.محمود مسلم

رئيس التحرير:

مصطفى عمار

ميار شريف: لم أتوقع دعم صلاح.. وسأحصل على ميدالية أولمبية (حوار)

05:45 م | الأحد 04 أكتوبر 2020
ميار شريف: لم أتوقع دعم صلاح.. وسأحصل على ميدالية أولمبية (حوار)

ميار شريف

بخطوات ثابتة، بدأت مشوارها الصعب، مع لعبة لا تملك شعبية قوية في بلادها، عافرت وحاولت وواجهت العديد من التحديات، ليصبح اسمها بين عشية وضحاها متصدراً لمحركات البحث على كافة التواصل الإجتماعي، وأصبحت صورتها غلافاً لأشهر المواقع العالمية، حاملة علم مصر ومحققة مجداً جديداً للعبة العظماء والملوك.

"الوطن" حاورت ميار شريف، بطلة التنس المصرية، لتروي كواليس مشوارها الذي شقت خلاله طريقها نحو العالمية، بعد أن سجلت اسمها في التاريخ، حيث أصبحت أول مصرية تصل للأولمبياد بعد حجزها مقعداً بدورة الألعاب الأولمبية طوكيو 2021، إلا أن ذلك لم يكن انجازها الوحيد، بل سطرت اسمها بأحرف من ذهب بعد أن أصبحت أول مصرية تصل للدور الرئيس لبطولة "رولان جاروس" إحدى بطولات "الجراند سلام" الكبرى في عالم كرة المضرب.. وإلى نص الحوار:

 

-كيف كانت بدايتك مع لعبة التنس؟

أنا بدأت تنس لأن أهلي كانوا بيحبوا اللعبة وأختي الكبيرة كانت بتلعبها قبلي، وتنقلت بين العديد من الأندية، وتدربت على يد العديد من المدربين.

 

كنت متوقعة أحقق انجاز في رولان جاروس.. ومصدقة في نفسي

 

-وهل وجدتي أن هذا التنقل في صالحك أم ضدك؟

مستواي الحالي يقول إنه كان في صالحي، لأني اكتسبت خبرات من كل مكان لعبت فيه.

 

-وهل كنتي تتوقعين تحقيق هذا الانجاز في رولان جاروس؟

رغم أنها كانت مشاركتي الأولى في البطولة، إلا أنني كنت متوقعة أن أحقق ذلك، أنا تحضرت نفسياً للبطولة، ومصدقة في نفسي فـ إيه اللي يمنع؟ لو الواحد مش مصدق في نفسه عمره ما هيوصل.

 

المصنفة الرابعة على العالم كانت مخضوضة من مستوايا وكانت عصبية

 

-وكيف كان شعورك حين علمتي أنك ستواجهين المصنفة الرابعة على العالم في الدور الرئيسي؟

مكنتش خايفة خالص، كل الناس كانت بتقولي حظك وحش، لكن أنا بالنسبالي كان عندي حافز أنزل وأكسب، وفعلاً خدت خبرة كبيرة وشوفت المستوى ده عامل إزاي، عرفت إني مش بعيدة رغم أنه ينقصني بعض الأشياء لكن قدرت أقدم المستوى ده.

 

-اروي لنا كواليس المباراة؟

بليسكوفا كانت مخضوضة، مكنتش متوقعة الأداء اللي لعبت بيه، وكانت متوترة وعصبية خصوصاً في المجموعة الأولى، وده طبعاً إداني ثقة أني مش بعيدة عن المستوى ده.

 

-وما انطباعك عن ردود الفعل سواء من المسئولين أو "السوشيال ميديا".

كان إحساس رائع واداني حافز قوي جداً وجالي دعم كبير.

 

-وما هو أفضل تعليق تلقيتيه؟

مكنتش متوقعة كلام محمد صلاح نجم ليفربول ومنتخب مصر عني، وده فرحني جداً، رغم أني لم أتواصل معه من قبل.

-وهل تتمني أن تكوني محمد صلاح التنس؟

طبعاً نفسي أبقى زيه وأحقق نجاحه في التنس وده هيكون شرف ليا، واللي أنا قدمته ده مجرد بداية ولسة اللي جاي أفضل.

شايفة نفسي ضمن أفضل 50 على العالم بعد سنتين.. وسأحصل ميدالية أولمبية

 

-أين ترين نفسك بعد عامين من الآن؟

شايفة نفسي السنة الجاية ضمن أفضل 100 لاعبة في العالم، وبعد سنتين ضمن أفضل 50 لاعبة إن شاء الله.

 

-كيف ترين نجاح التونسية أًنس جابر؟

نجاح أُنس جابر بيخليني أصدق أكتر أني أقدر أنجح وأبقى أحسن، هي مرت بنفس الصعوبات، ونجاحها بيديني حافز أكبر.

 

المدربين في مصر بيفكروا في الفلوس.. ومحدش قالي أنا مصدق فيكي

 

-هل ترين أن استقرارك في إسبانيا ساعدك في الوصول لهذا المستوى؟

أنا بقالي سنة ونصف عايشة برا، لكن معظم حياتي كنت بسافر وكنت بدرس في أمريكا، لكن الفترة اللي فاتت فرقت معايا لأني لقيت تفاهم مع مدربي الإسباني ملقتوش مع حد في مصر.

 

-ماذا يعني ذلك؟

في مصر معظم المدربين بيدربوا علشان الفلوس، محدش متفرغ أو بياخد مخاطرة عشان يطور مستوايا، بتدرب مع 3 لاعيبة فمفيش تركيز معايا، عمر ما حد قالي أنا مصدق فيكي عكس اللي حصل معايا في إسبانيا.

 

-اروي لنا موقف حدث معك في هذا الجانب؟

كنت متفقة مع مدرب أتدرب معاه وفجأة مبقاش يرد عليا، اختفى تماماً ودلوقتي بيكملني بعد ما حققت انجازات.

 

-وهل ترين أن اللاعب المصري مظلوم؟

طبعاً، احنا عندنا خامات كويسة جداً، لكن مفيش اهتمام أو دعم، مفيش نظام اللاعب يمشي عليه، محدش بيدينا الدعم عشان نبقى كويسين، الدعم بيجي بعد النجاح، أنا كنت محتاجة ده قبل كده.

 

-وما هي رسالتك لتفادي ذلك؟

رسالتي للمؤسسات، اللجنة أولمبية ووزارة الرياضة والاتحادات والرعاة لازم يركزوا على الموهوبين، محدش هينجح لوحده، لازم حد يساعده، مش لازم نستنى النتايج، ولازم يبقى في طموح ومخاطرة.

 

ولماذا ترين أن هناك مخاطرة في التنس؟

التنس بالذات ممكن اللاعب يفضل يخسر بشكل متتالي، ويرجع يكسب تاني، أنا في أول 5 أشهر السنة دي فضلت أخسر 3 أشهر، بعد كده كسبت 27 مباراة، لازم أكون مصدقة في نفسي وأخلي المشاعر السلبية تدفعني للأمام.

 

-وما أصعب الأزمات التي واجهتك؟

قابلت مشاكل كتير مادية لأن مصاريف التنس صعبة جداً، وده اللي خلاني أسافر أمريكا أدرس هناك، ولو كان في دعم كان ممكن أحقق النتايج دي من 5 سنين.

 

-ولماذا لا يوجد دعم للعبة في مصر؟

مصاريف التنس صعبة جداً، وده بيحط ضغط على اللاعب لو مكسبش مش هيعرف يدفع حاجة معينة، عشان كده في أمريكا الموضوع كان أسهل، مصاريف الجامعة مدفوعة وبلعب في دوري الجامعات، لكن في مصر ده مش متوفر في الجامعات.

 

أقول لمنتقدي لعب البنات للتنس: خليكوا في حالكوا

 

-هل تؤرقك التعليقات السلبية عن الملابس أو كونك رياضية بشكل عام؟

طبعاً بضايق لأن مش من حق حد يحكم عليا، دي تفرقة إن الرجل يلعب براحته ويلبس شورت والبنت لا، اشمعنى؟ أنا من حقي أعمل الحاجة اللي بحبها وأنت مش من حقك تحكم عليا، المفروض كل واحد يخليه في حاله وحياته.

 

تقدير الأهلي لي شرط التجديد.. وأملك عروض أخرى

 

-وماذا عن التجديد للنادي الأهلي؟

لسة معرفش هجدد ولا لا، ده مش أكيد خالص، أنا عندي عروض تانية من كذا مكان، ولو الأهلي لم يمنحني ما أستحق أكيد هشوف عرض تاني أفضل.

مبفكرش في الجواز التنس حياتي كلها

-وما هي مواصفات فتي أحلامك؟

مبفكرش خالص في الموضوع ده، أنا حياتي كلها تنس وبس من غير تفكير في أي حاجة تانية.

 

-في النهاية هل ترين نفسك على منصة التتويج في أولمبياد طوكيو؟

طبعاً، ان شاء الله أقدر أخد ميدالية في الأولمبياد.