عبدالحفيظ عن إهانة شيكابالا: كل ما اللاعب يرد هيبقى فيه تطاول

أخبار متعلقة

بسيوني: الأهلي والزمالك أعادا الهيبة للكرة المصرية في أفريقيا

وليد صلاح الدين: الأهلي والزمالك قدما صورة مشرفة للكرة المصرية

بانون: الأهلي يستحق التتويج بـ التاسعة.. وجاهز للمشاركة أمام الاتحاد

كاف: عقوبات قاسية تنتظر لاعبي الأهلي والزمالك بعد خناقة النهائي

قال سيد عبدالحفيظ مدير الكرة بالنادي الأهلي، إن مباراة الأهلي والزمالك، أمس، كانت مهمة بشكل كبير.

وأضاف عبدالحفيظ، خلال مداخلة هاتفية ببرنامج "مساء DMC" والذي تقدمه الإعلامية إيمان الحصري، والمذاع على فضائية "DMC"، أنه لم يحدث من قبل وجود فريقين من نفس الدولة في نهائي دوري أبطال أفريقيا، وهو سبب أهمية المباراة أمس: "في الدوري ممكن يبقي فيه مباريات بتجمع الفريقين، والمباراة دي كان ليها أثر نفسي آخر".

وأوضح أن تلك البطولة كانت بعيده عن النادي الأهلي، ما يقرب من السبع سنوات، كما غابت عن نادي الزمالك فترة 18 عاما، وهو ما أعطى للمبارة أهمية بالغة، سعى كافة لاعبي الفريقين لإثبات حضورهما وقوتهما في تلك المباراة: "المباراة كانت فخر للكرة المصرية كلها".

وأكد أنه وفي ظل غيابات عدد من اللاعبين المؤثرين أصبحت المباراة صعبة: "أليو ديانج، كان موجود في التشكيل الأساسي، ومكنش فيه مشكلة خالص، ولما عملنا له اختبار PCR تبين مرضه بفيروس كورونا، وكان عندنا ثقة في السولية، إنه يعوض الغياب، وكرة القدم في النهائيات بتتاخد على الأجزاء، ممكن تبقي مستحوذ بشكل كبير أوي ومتتوفقش، واحنا قدرنا نجيب جول في أول 7 دقائق، وجول في آخر 4 دقائق".

وأشار إلى أن وليد سليمان، جاءت مسحته سلبية، وسيجري التأكد من ذلك غدا.

وتابع: "الصورة لحد الدقيقة 90 كانت شبة مثالية، ومكنش فيه أي مشكلة بين الأجهزة أو اللاعبين، وبعد المباراة كان هناك تصرف فردي وجرى التعامل معاه، ومش عايز أقف عنده علشان لو قيسناها بقيمة الحدث مش هتساوي كتير".

وأوضح: "ما لاقاه شيكابالا مينعفش يكون شكل التنافس، ومينفعش تزيد عن حد معين، وطالما مفيش سيطرة بتحصل أحداث مش مظبوطة، وحان الوقت إن الناس يكون عندها فكرة ان دي كرة قدم ووارد فيها المكسب والخسارة، والفرقة اللي بتحضر من بدري وعندها العقلية الاحترافية والشخصية القوية هي اللي بيكون ليها مكانة والأفضلية".

واستطرد: "قناعتي الشخصية أن مهما الجمهور كان منه تجاوز على اللاعب ضبط النفس وعلى المسؤول أيضا، لأنهم في الآخر أمام جماهير، ولما يكون التصرف خارج من مسؤول لازم يكون فيه وقفه، ولكن الجماهير كل ما كان فيه رد فعل من لاعب تجاه جمهور بيكون فيه امتداد وتطاول، وأنا رافض أي تطاول على أي شخص في المنظومة سواء في الفريق أو غيره، وأنا برفض الإهانة والتجريح ومش بقبله لحد تاني".

واختتم: "مؤمن زكريا واحد من صحابنا واخوتنا وعنده الحاجة اللي بندور عليها في اللاعبين كلهم، وفجأة وبدون مقدمات حدث ذلك، وزي ما كرة القدم فيها تنافس ومشاحنات فيها مواقف الناس بتتجمع حواليها، ومؤمن واحد اتجمع حواليه كل الناس، والصورة دي تعبير مننا ومن الزمالك والاتحاد الأفريقي وكل المنظومة الرياضية لدعم اللاعب، وعندنا عدد من اللاعبين الجدد، مجموعة كبيرة من الأسماء، وهيكون ليهم تواجد في المباريات المقبلة، وعندنا مباراة يوم الثلاثاء مع الاتحاد السكندري، ونعديها بسلام ونفكر في اللي بعدها، والأفراح مستمرة لحد بكرة، وهنقفل شوية علشان عندنا هدف تاني، وجمهور الأهلي دائما بيطالبونا بكل ما هو جديد".

ووجه كلمة للجمهور الذي يسيئ لأي ناد: "الانتماء شيء عظيم، في المرحلة الأولى البلد، والمرحلة الثانية النادي، بالانتماء والتشجيع والمؤازرة، والجمهور بفطرته منتمي لناديه بشكل كبيبر أوي، وبنساعد بعض على الطاقة الإيجابية، والأفضل لما الأمور كلها تمشي بشكل كويس أوي".