فرجانى ساسي مع مشجعة زملكاوية
أبكي لما الزمالك يخسر.. والسكر وصل 600 وكنت هموت بسبب «قاضية قفشة»
نفسي جنازتى تخرج من الزمالك.. وروحت النادي دون علم أبنائي
مش محتاجة عضوية الزمالك.. ونفسي أبوس إيد كل لاعب حبا في الكيان
منحت فرجاني زجاجة برفان بـ30 جنيه.. ومستعدة أتبرع عشان عبدالله جمعة
ضربت سوزان قنديل مشجعة نادي الزمالك، التي تبرعت بقرطها الذهبي لتجديد عقد التونسي فرجاني ساسي، لاعب وسط الفريق الأول لكرة القدم بالقلعة البيضاء، نموذجا في الانتماء وعشق الكيان الأبيض، خاصة أنها في سن الستين ومرتبطة بالأبيض منذ الصغر.
«الوطن سبورت» تواصلت مع سوزان قنديل مشجعة نادي الزمالك، لمعرفة سبب تواجدها داخل الزمالك وكواليس مقابلتها للاعبي الفريق والجهاز الفني، وسر تشجيعها للقلعة البيضاء وأمور أخرى كثيرة في الحوار التالي:
أنا أول مرة أدخل نادي الزمالك في حياتي، وقعدت يومين علشان أدخل وفي اليوم الأول قعدت اتفرج على الناشئين، وكنت فرحانة بيهم، وجمال عبدالحميد قالي إمشي يا حاجة وتعالي يوم تاني، وأنا قمت ببيع حلق خاص بي قيمته 940 جنيها، وأحضرته لإدارة نادي الزمالك لتكون بداية لجمع مبلغ التجديد لساسي، وكنت عارفة إن الناس هتضحك عليا، ولكن حب الزمالك عندي بالدنيا، وللعلم مستعدة أبيع عمري وفرجانى يجدد، وإحنا 50 مليون زملكاوي في مصر لو كل واحد دفع جنيه فرجاني هيجدد ونفسي عبدالله جمعة هو كمان يجدد عقده.
أنا عندى 60 سنة وبشجع الزمالك وأنا عمري 6 سنوات، واحرص على مشاهدة مباريات الزمالك بمفردي، لأننى أتعصب ولا أرغب في وجود أحد معي أثناء تشجيع الزمالك، وحينما فاز الأهلي على الزمالك مؤخرا في بطولة افريقيا بهدف قفشة، بكيت بشدة والسكر وصل إلى 600 وكنت على وشك الموت.
أنا بموت في الزمالك، وميهمنيش أي كلام وأنا مش محتاجة فلوس، ومجيتش النادى أتسول، أنا طلعت عمرة 3 مرات واشتريت مقابر بـ80 الف جنيه الأسبوع الماضي، وأولادي مرتاحين ماديا ومش محتاجين حاجة من حد، ونفسى لو مت جنازتي تطلع من نادي الزمالك.
أقول لك أثناء وقوفي في اليوم الثاني أمام بوابة النادي، الأمن أبلغني بدخول المستشار هشام إبراهيم نائب رئيس النادي، فأخبروه بأنها ترغب في مقابلة أحد من الإدارة لعرض أمر مهم على إدارة الزمالك، ورحب بي بمجرد علمه بأني أرغب في مقابلة فرجاني ساسي والتبرع بقرطي الذهبي كمساهمة في تجديد تعاقده، وقام بتكريمي وجعلني أقابل فرجاني ساسي، وأنا مش محتاجة عضوية الزمالك، وقعدت قدام النادي وإيدي على خدي حوالي 8 ساعات علشان أدخل.
أولادي عارفين إني بحب الزمالك، ودائما بيساندوني وبيشجعوني، وأقول لك أنا ذهبت للنادي من ورا ولادي، وكانوا رافضين وقعدوا يدوروا عليا ساعات، وأنا مش مكسوفة من حاجة ومش بعمل حاجة غلط ومروحتش أتسول زى ما ناس كتير قالت، أنا شبعانة وعينيا مليانة وربيت ولادي على الغالي وعزة النفس، وأبوهم توفى من 20 سنة وكنت ببيع في سوبر ماركت علشان تربيتهم، والحمد لله كلهم تعليم عالي ومستورين.
فرجاني ساسي قبّل رأسي وأكد لي البقاء في القلعة البيضاء، ومنحته هدية عبارة عن برفان خاص كنت محتفظة به من 10 سنوات، وكنت شارياه بـ30 جنيه الزجاجة، وكان نفسى أقابل شيكابالا ولكن معرفتش، كنت عايزة أحضنه، دا ابني، واتصورت مع جميع لاعبي الزمالك، وللعلم مستعدة اتبرع علشان عبدالله جمعة يجدد، ولو أتت لي الفرصة هبوس إيد كل لاعب في النادي عشقا في الكيان.
تعليقات الفيسبوك