حسين لبيب ووزير الرياضة
رد حسين لبيب، رئيس اللجنة المؤقتة بنادي الزمالك، لأول مرة على تساؤلات الجماهير بشأن دخوله انتخابات النادي الأبيض المقبلة، بعد نجاحه الكبير رفقة الفريق في جميع الألعاب، وكذلك القلعة البيضاء في تحقيق ألقاب.
وقال «لبيب» خلال ظهوره ببرنامج «مساء أون تايم»، رفقة الإعلامي إبراهيم عبدالجواد: «السؤال ده مبيعجبنيش لأن أنا هخدم نادي الزمالك إزاي، وعشان أنزل انتخابات لازم يبقى معايا مجموعة تبقى قادرة على تلبيه طموحات جمهور الزمالك، وحتى هذه اللحظه لم تتبلور الفكره كاملة في دماغي، ومع احترامي لكل الأشخاص اللي اتقالي خد ده معاك لأنه كتلة انتخابية أنا عاوز شخص يفيد الزمالك مش يفيدني أنا شخصيا».
وأضاف رئيس اللجنة المؤقتة التي تدير نادي الزمالك:« بقول لكل الكوادر تعالوا اقعدوا معايا ونتفق مع بعض وأنا هتنازل عن الانتخابات، المهم اللي يفيد الزمالك»، مؤكدا: «اللي ضيع الزمالك الخناقات المستمره، واللي أنا عاوزه النادي، مش مهم حسين لبيب يخسر أو يكسب، ومش مهم حسين لبيب أصلا».
وتابع: «المجموعة اللي معايا هي اللي عملت حسين لبيب، وعملت شعبية حسين لبيب، وكلامي ده مش سياسي ده حقيقي جدا، هاني برزي والإتربي وغيرهم عقليات إدارية ممتازة، المنظومة هي اللي بتنجح مش الشخص لوحده، ومفيش قرار واحد طلع طول الـ3 أشهر إلا وكان قرار المجموعة كلها مش قرار حسين لبيب لوحده».
وشدد حسين لبيب: «أكتر إشاعة ضايقتني الإشاعات عن أمر الانتخابات، لابد أن يعرف الجميع أننا لم نأت من أجل الانتخابات نهائيًا ليس في تفكيرنا هذا الأمر».
وطالبت شريحة كبيرة من جماهير نادي الزمالك نزول حسين لبيب الانتخابات المقبلة؛ إذ رأى البعض أنه يليق بالقلعة البيضاء.
تعليقات الفيسبوك