أحمد مرتضى: عشنا سنة صعبة خلال الموسم الماضي.. ونعمل على إسعاد الجماهير
11:30 م | الخميس 21 أبريل 2022
أحمد مرتضى
أكد أحمد مرتضى منصور، عضو مجلس إدارة نادي الزمالك، أن الأبيض مر بسنة صعبة للغاية، رغم التتويج بالبطولات في الموسم الماضي.
أحمد مرتضى: عشنا سنة صعبة
وقال أحمد مرتضى في تصريحات خلال احتفالية الزمالك بتواجد دروع الدوري الأربعة للألعاب الجماعية كافة: «عدت علينا سنة صعبة، شوفنا فيها اللي ميتشافش.. عملنا كل حاجة عشان نرجع النادي زي ما كان، الناس انتخبتنا عشان نخدم وأي تعب بنحس بيه ولا حاجة عشان نسعدكم، ودي بداية مش نهاية إننا نحصل على كل حاجة، دعواتكم بكرة عندنا ماتش مهم عايزين نكسب وعندنا ثقة في رجالة الطائرة».
خالد لطيف عضو مجلس الزمالك
وقال خالد لطيف، عضو مجلس إدارة الزمالك: «النهاردة هتكلم كزملكاوي وابن نادي الزمالك وعائلتي الزملكاوية، جايين نحتفل بـ4 ألعاب، وأشكر مجلس إدارة الزمالك السابق، برئاسة مرتضى منصور؛ لأنه هو اللي بدأ مسيرة الألعاب الجماعية، والمجلس الحالي كله جديد بما فيهم أنا، عدا أحمد مرتضى وعلاء مقلد، 4 ألعاب حققوا إنجاز لم يحقق من قبل».
وأضاف «لطيف»: «بوجه التحية لجهاز كرة الطايرة، بمناسبة الفوز بدرع الدوري، علاء فهمي رئيس جهاز الطائرة، وأشرف أبو الحسن، كابتن الفريق.. بحيي جهاز كرة السلة وعلى رأسه كابتن أحمد عادل عبدالفتاح المشرف على الفريق، وأنس أسامة، كابتن الفريق.. بحيي كرة اليد وحسام غريب، رئيس قطاع كرة اليد، وأحمد الأحمر».
نهاية سعيدة للعام الماضي
فيما قال أنس أسامة، لاعب فريق السلة: «من الأيام اللي الواحد بيبقى مبسوط فيها. السنة اللي فاتت كانت طويلة وانتهت نهاية سعيدة.. ضروري إننا ندي كل واحد حقه وأول واحد هو المستشار مرتضى، اللي من ساعة ما رجع والدنيا بقت أحسن، وتاني واحد أحمد مرتضى اللي تعبناه طلبات، تالت حد هو الجمهور اللي واقف في ضهرنا، وعندنا دوري وأفريقيا، بنوعد المستشار بحصدهما، وشكرا للجميع واليوم العظيم ده».
أحمد الأحمر: أشكر مجلس إدارة الزمالك
بينما قال أحمد الأحمر، لاعب فريق اليد: «مبسوط جدا لوجودي النهاردة، ووسط الجمهور ده بنحاول دائما نسعده، وبشكر في الأول الأستاذ مرتضى، وده من 2015؛ لأن وقتها كلنا كنا محترفين، وكان في مشكلة كبيرة في الفرقة، وقدر يرجعها كلها وكسبنا كل حاجة تقريبا في آخر 7 سنين، وده بفضل جمهور الزمالك وفضل المجلس برئاسة مرتضى».
تعليقات الفيسبوك