ميدو: الأهلي يدفع ثمن أخطاء مسؤوليه.. و«ترزي الماتشات فصلها غلط»
11:51 م | الثلاثاء 05 يوليو 2022
فريق الأهلي
تحدث أحمد حسام ميدو لاعب ومدرب الزمالك السابق، عن سبب تعادل الأهلي مع الجونة سلبيا، في المباراة المؤجلة من الجولة التاسعة من بطولة الدوري الممتاز.
وقال «ميدو» عبر برنامجه «الريمونتادا» على قناة «المحور»: «مسؤولو الأهلي اتعاقبوا بسبب تأجيل المباريات، والأهلي كان ممكن يكسب الجونة وهو نايم على السرير لو كان الماتش ده اتلعب في ميعاده».
أضاف: «مسؤولو الأهلي كانوا بيحاولوا يكونوا أذكياء، وفاكرين إن التأجيل هيفيد، لكن كرروا غلط الموسم اللي فات، الأهلي بيلعب في ضغط ماتشات، طب ما كده كده الماتشات دي هتتلعب وهتتلعب تحت ضغط بعد التأجيل».
ميدو للأهلي: «الترزي اللي بيفصل الماتشات ورطكوا في الدوري»
وتابع ميدو: «الترزي خسر الأهلي الدوري السنة اللي فاتت مع رجولة لاعيبة الزمالك، اعرفوا انتو بقى مين الترزي اللي بيفصل الماتشات».
أضاف: «الترزي اللي بيفصل للأهلي خد مقاستكو غلط، والبدلة طلعت ضيفة عليكو، وده حصل السنة اللي فاتت، والسنة دي الترزي لسه بيورطكوا وعمل مقاس البدلة غلط».
ميدو: الأهلي يعيد نفس سيناريو الموسم الماضي
وأضاف ميدو: «الكلام واضح، شوفوا مين الترزي اللي ورط الأهلي وخلاه يفقد نقاط كتير في الدوري بعد تأجيل مبارياته».
واختتم: «الأهلي بيعيد نفس أخطاء الموسم الماضي بتوصية من نفس الأشخاص والمسؤولين، وبرضوخ من نفس الجهات والنتيجة نزيف نقاط كان ممكن عادي جدا بكل بساطة ميخسرش النقاط دي».
تعليقات الفيسبوك