شوبير يطالب بمنح الفرصة لـ«سواريش» مثل فيريرا
10:18 ص | الأربعاء 03 أغسطس 2022
ريكاردو سورايش مدرب الأهلي
دافع الإعلامي أحمد شوبير، عن ريكاردو سواريش، المدير الفني لفريق الكرة بالنادي الأهلي، في ظل الأصوات التي تطالب برحيله، بعد نزيف النقاط الذي يعاني منه الفريق في مسابقة الدوري، فضلا عن خسارة لقب كأس مصر لصالح الزمالك.
وقال «شوبير» في برنامجه الصباحي على إذاعة «أون سبورت إف إم»: «هناك هجوم عنيف على سواريش، بعد ما خسر 7 نقاط في الدوري وضياع الكأس، وكلام بعض الناس إن سواريش لازم يمشي».
شوبير يطالب بمنح فرصة لسواريش مثل فيريرا
وأضاف حارس الأهلي ومنتخب مصر الأسبق: «أنا مش هروح بعيد، هروح للعبقري فيريرا اللي لما مسك الزمالك في الولاية دي حقق نتائج مفاجأة، لم يفز في أي مباراة ببطولة أفريقيا، والزمالك خرج من دور المجموعات بعد أن خسر مباراة وتعادل اثنتين، وكان الفريق صاحب أقل عدد من النقاط».
وأوضح نائب رئيس اتحاد الكرة الأسبق: «الناس كلها هاجمته ساعتها، وأصوات تانية طالبت بمنحه فرصته في الدوري، لكن النتائج كانت سيئة أيضا في بدايته مع الدوري، والناس واصلت هجومها».
وتابع أحمد شوبير: «الناس كلها قالت المفروض كارتيرون كان كمل، زي اللي بيقول دلوقتي كان المفروض الإبقاء على موسيماني، رغم إن نفس الناس هي اللي طالبت برحيله، وقالت مستوى الفريق سيء وبيخسر».
وأردف: «بعد خسارة الزمالك أمام طلائع الجيش، الفريق قدر يحقق 11 انتصار وتعادل وحيد أمام الأهلي، ودلوقتي بيتقال على فيريرا فيلسوف وعبقري وياريته كان كمل من 2015».
وطالب «شوبير» بعدم الاستعجال في الحكم على ولاية سواريش مع الأهلي، قائلا: «مانويل جوزيه بجلالة قدره بعد نتائج أول سنة، الأهلي مشاه، وبعدين جه تاني».
شوبير: السوشيال ميديا توغلت وبقى بيتعملها ألف حساب
وشدد حارس الأهلي الأسبق، على أن «المشكلة دلوقتي إن بقى عندنا سوشيال ميديا، توغلت بشكل كبير وفي ناس بتخاف منها وبتعملها ألف حساب، وده مش صح، لازم أنت اللي تسوق، تحترم الجمهور لكن في النهاية أنت اللي شايف، والأهلي عنده قيادات تقدر تقيم الأمور بشكل صحيح».
وانتقل أحمد شوبير للحديث عن الراحلين من الأهلي، قائلا: «متسمعوش للشائعات، على سبيل المثال في ناس بتقول الثنائي مصطفى شوبير وعلي لطفي هيمشوا، أمال هيكمل بمين؟»، مضيفا: «زي ما قلت قبل كده المدرب لم يطلب التعاقد مع حراس مرمى من الأساس».
تعليقات الفيسبوك