رئيس مجلس الادارة:

د.محمود مسلم

رئيس التحرير:

مصطفى عمار

في ظل غياب الثنائي.. حوار تخيلي بين "ميسي ورونالدو" قبل الكلاسيكو

12:32 م | الأحد 28 أكتوبر 2018
في ظل غياب الثنائي.. حوار تخيلي بين "ميسي ورونالدو" قبل الكلاسيكو

ميسي رونالدو

يستضيف ملعب كامب نو، في الخامسة والربع من مساء اليوم الأحد، مباراة الكلاسيكو بين برشلونة وريال مدريد، في إطار الجولة العاشرة من الدوري الإسباني "لاليجا".

ومن المنتظر أن يفقد الكلاسيكو اليوم، الكثير من رونقه في ظل تأكد غياب الثنائي كريستانو رونالدو نجم ريال مدريد السابق، وليونيل ميسي نجم برشلونة، في ظل رحيل الأول لصفوف يوفنتوس الإيطالي، وإصابة الثاني بكسرع في الكوع وغيابه عن الملاعب قرابة الشهر.

ويستعرض "الوطن سبورت" على سبيل التخيل، "حوار" دار بين النجمين البرتغالي والأرجنتيني، في ظل غياب الثنائي عن الكلاسيكو الذي صال وجال فيه النجمين الكبيرين طوال السنوات الماضية.

رونالدو: أنت مصمم تبقى معايا يا ميسي في جملة مفيدة طيب أنا هغيب عشان مشيت من الدوري الإسباني خالص وروحت يوفنتوس أنت بقى هتغيب برده عشان الكل يفضل يقول غياب رونالدو وميسي عن الكلاسيكو

ميسي: الإصابة يا عم رونالدو هي السبب لعنة الله عليها.. بالعكس أنا كنت عاوز ألعب الماتش ده بالذات

رونالدو: اشمعنى يعني

ميسي: أول حاجة أنت غايب عن الكلاسيكو وأنا دائرة الضوء كانت كلها هتبقى ناحيتي لوحدي، تاني حاجة ريال مدريد مش شايف من أول موسم وخسر 3 متشات واتعادل ماتشين وده فرصة ذهبية للتألق وتحطيم أرقام جديدة بس الإصابة بقى اعمل فيها ايه.

رونالدو: ناصح أنت يا عم ميسي شفت بقى أنا أنصح منك ازاي وخلعت في الوقت المناسب

ميسي: شكلك قريت المشهد بدري وكنت حاسس أن ريال مدريد مش هيبقى كويس الموسم ده

رونالدو: طبعا يا نجم المقدمات بتؤدي إلى نتائج وزين الدين زيدان حس بكده قبل مني وخلع هو كمان.. رئيس النادي مش عاوز يدعم الفريق ورامي الحمل كله عليا وأنا هفضل شايل الفريق لحد امتى بس.

ميسي: امال الناس في أول الموسم لما بنزيمة جاب جونين قالك بس الريال تخلص من فردية رونالدو والفريق بيلعب جماعي

رونالدو: اه اتفضل يا عم.. بنزيمة اللي بيضيع الفرص وهو ادام خط مرمى الخصم جابله جونين قالك فردية رونالدو كانت مغطية عليه، شوف بقى عمل ايه بعد كده اهو الفريق في المركز الثامن وهو داخل يلعب كلاسيكو ده مكانش بيحصل وأنا موجود.

ميسي: عامة احنا النهاردة هنخلص على الريال خالص وهتبقى الضربة القاضية

رونالدو: مش عارف أقولك ايه أنا بشجع الريال وهتفرج على الماتش وأتمنى تحصل المعجزة والفريق يفوق النهاردة على حسابكم

ميسي: المهم أنت عامل ايه في الدوري الإيطاالي

رونالدو: اديك شايف بعد 10 جولات متصدر اليوفي بـ28 نقطة وبفارق 7 نقط عن نابولي أما الريال في المركز التامن بعد 9 مباريات وهيلعب الجولة العاشرة مع برشلونة مش بقولك شفت المشهد بدري وخلعت في الوقت المناسب.

ميسي: مش سهل أنت يا دون وكمان فلت من موضوع الضرائب ده اللي بقى يستهبلوا فيها في إسبانيا اوي.

رونالدو: اه يا نجم عقبالك انت كمان.. مبتفكرش تخلع بسبب الضرائب ولا ايه.

ميسي: مش في دماغي دلوقتي يا دون خصوصا بعد أن ما أنت مشيت وريال مدريد شكله هيقع موسم ولا اتنين احقق فيهم ألقاب وأحطم أرقام مع برشلونة وابقى اضغط لزيادة عقدي واعوض خصم الضرائب.

رونالدو: ماشي يا نجم لينا مكالمة بعد الماتش ونشوف ايه اللي هيحصل

ميسي: معتقدش هيبقى ليك نفس تكلمني بعد الماتش ورغم أن أنا غايب إلا أننا هنكسب سكور كبير كمان.