إسلام الشاطر
علق إسلام الشاطر لاعب الأهلي السابق والإعلامي الحالي بقناة القلعة الحمراء على مواجهة الأهلي والبايرن في نصف نهائي كأس العالم للأندية، منتقدًا من يقلل من الإنجاز الذي حققه النادي الأهلي بالوصول إلى نصف نهائي كأس العالم للأندية لملاقاة بايرن ميونيخ بطل دوري أبطال أوروبا، وقال خلال حديثه ببرنامجه بقناة الأهلي: «أنا بتكلم مع اللاعبين مبسوطين وحاسين بالمسؤولية الكبيرة وعارفين إن الأهلي وجمهوره مبيفرقش كتير إنت بتلاعب مين إنت عايز تكسب وخلاص وعايز أجيب جول واتنين وتلاتة وعشرة لو أقدر هي دي الكورة، ولكن إيه اللي ممكن يحصل يوم الاتنين متعرفش، ممكن لا قدر الله نخسر لأنك بتلاعب بطل العالم مش بطل دوري أبطال أوروبا فقط، بتلاعب 11 لاعب نقاط الضعف فيهم قليلة جدا ولكن هل هناك فريق في العالم بدون نقاط ضعف؟ مستحيل مبيحصلش».
ووجه الشاطر لاعب الأهلي السابق والإعلامي الحالي بقناة القلعة الحمراء رسالة لمن قلل من فوز الأهلي على الدحيل بهدف دون رد والذي قاد الأهلي للتأهل لنصف نهائي كأس العالم من أجل ملاقاة بايرن ميونيخ.
وقال «الشاطر» من خلال برنامجه بطل الكأس والذي يقدمه عبر قناة النادي الأهلي: «فيه بعض الناس قبل المباراة كانت بتقول كلام وبعد المباراة بتقول كلام تاني هم مش بيشجعوا النادي الأهلي المفروض إنت كإعلامي تكون عارف إن الكرة فيها كل حاجة ولكن إنت قلت كلام وعكسه قبل وبعد المباراة من أجل التقليل من الأهلي وقلت إن الدحيل فريق كبير وعظيم ويقدر يكسب أي حد وبعد المباراة قلت إن الدحيل فريق على قده ولكن الدحيل محترم وجيد ويمتلك لاعبين ومدرب جيدين جدا».
وتابع: «فالموضوع غريب جدا إنت عمرك ما تقلل من فوز الأهلي لأنك إنت متعرفش إيه اللي بيحصل في كأس العالم للأندية أتمنى تعرف إحنا 6 مرات مرة 3 ومرة 4 ومرة 6، بس اشتركنا 6 مرات بعد بعد ما أصبحنا بطل القارة فلما تعرف يعني إيه كاس عالم هتلاقي نفسك بتتكلم بمنطقية أكتر ومش هتعرف تقلل من قيمة إنجاز الأهلي المعمول لازم كل واحد يعرف هو فين، متتكلمش وخلاص ولا أي كلام وخلاص يتقال، وجماهير الأهلي مبسوطة وفرحانة وسعيدة باللي بيحصل وبالمناسبة أقدر أجيب الفيديو وإنت بتتكلم قبل وإنت بتتكلم بعد، ولكن لما الكبار بيتكلموا بطل دوري أبطال أوروبا وبطل دوري أبطال أفريقيا الصغيرين بيتدخلوا ليه إنت حضرتك بعيد جدا آخر الصف».
تعليقات الفيسبوك