رئيس مجلس الادارة:

د.محمود مسلم

رئيس التحرير:

مصطفى عمار

حرااام - كفااااية - أنا مش بطل

08:21 م | الأحد 16 نوفمبر 2014
كتب:
حرااام - كفااااية - أنا مش بطل

«حراااااااااااام.. كفااااااية» جملة تتغنى بها الجماهير المصرية عندما تتمتع بأداء فريقها وهو يذل المنافس ويلقنه درساً فنياً كروياً مميزاً، مشفقين على الضيوف من هول مواجهة البطل وكم تلاعب الفرعون المصرى بأسود وذئاب وأفيال وثيران وثعالب، وأى حاجة فى أفريقيا.
لقد حصد المنتخب الأفضل فى تاريخ مصر على ثلاث بطولات أفريقية متتالية، وهذه هى بداية المأساة، لأن البطولة تأتى بالصدفة دون ترتيب، والصدمة والسقوط نتيجة للعشوائية التى تدار بها الرياضة المصرية، بداية من وزير الرياضة، واللجنة الأولمبية، والاتحادات، فالكل حافظ مش فاهم، ونظام المصلحة والمحسوبية والمجاملات هو البند رقم واحد فى قانون الرياضة المصرية.
هزيمة المنتخب أمس الأول أمام نظيره السنغالى لم تكن مفاجئة بالنسبة لى، بل توقعتها هزيمة ثقيلة، وأدركت أننا ندفع ثمن أمور كثيرة أولها توقف النشاط الرياضى لثلاثة مواسم لتتراجع الكرة المصرية، وثانيها والأهم العيش فى وهم البطل؛ نرقص ونتغنى «نحن أبطال أفريقيا أسياد القارة السمراء»، وهذا غير حقيقى، فنحن فى كرة القدم صبيان أفريقيا، وكفاية وهم وخداع.
حال منتخب مصر لا يختلف عن حال البلد، الكل يتكلم ويغنى ويرقص وماحدش بيشتغل، الكل كسلان وعايش فى الماضى، الكل بيتكلم عن إمبارح ومالوش دعوة ببكرة، لا شوقى غريب ولا غيره يكسب السنغال، نحن لا نستحق شرف التأهل لبطولة أفريقيا، والقضية ليست هزيمة المنتخب أمام السنغال، إنما هى أكبر من ذلك، القضية فى المنظومة الكروية الفاسدة، بداية من وجود إعلام رياضى فاسد يتمثل فى بعض من يظهرون على الشاشات، وإدارات جاهلة ووكلاء لاعبين تجار، ولاعبين لا يمتلكون النخوة ولا الثقافة، وأعذرهم جميعاً لأن قدراتهم الفنية لا تؤهلهم لتمثيل منتخب مصر.
وعاتب على كل هؤلاء أنهم فى تصريحاتهم يحلمون ولا يدركون الواقع، ويوهمون الجماهير بقدراتهم، وهو نوع من أنواع النصب واستغلال طيبة الجماهير، فأبناء الجيل الحالى من اللاعبين محليون وقدراتهم محدودة، المحترفون أيضاً على نفس الشاكلة، كله شبه بعضه.. يعنى محمد صلاح لاعب المقاولون العرب (ماحدش يقول لى والنبى إنه بيلعب فى تشيلسى، الكلمة دى بتغيظنى، وربنا يجازيك يا أبوتريكة أنت من صنعت صلاح ليلعب فى تشيلسى، لأنك كنت لاعباً بحجم فريق «منتخب أبوتريكة» فأنت أعظم لاعب فى تاريخ مصر الكروى، فصلاح بعد أبوتريكة زى ما كان قبل ما يشوف لاعب المقاولون الحياة فى إنجلترا.
فين أيام تريكة وجمعة وبركات وأحمد حسن ومحمد زيدان المحترف الحقيقى، وأحمد حسن ميدو المهاجم العبقرى، وعمرو زكى، وعماد متعب أيام زمان، وأحمد فتحى رجل الإسماعيلى، وحسنى عبدربه وعصام الحضرى وسيد معوض، ألف رحمة يا جدعان على نجوم الكرة كبار اللى صنعوا تاريخاً كبيراً، وعلى فكرة الهزيمة فى الرياضة والكرة مش مشكلة، الأزمة الكبيرة أننا لا نعترف بالهزيمة ولسة مصدقين أننا أبطال أفريقيا.
اصحَ يا وزير الرياضة، صحّ النوم يا اتحاد الكرة، إحنا ولا حاجة فى الكرة الأفريقية، إحنا أكبر كدبة كروية، يعنى بعد الفشل 3 مرات فى التأهل لأفريقيا لسة بنكابر.. يا جماعة علشان يبقى فيه حل لازم نعترف الأول بالأخطاء وتشوف مكانك كويس وتحدد قدراتك.
مش عيب أن قدراتك الفنية ضعيفة، ومش فضيحة أن السنغال كسبتنا، الكارثة أننا لسة بنتكلم أننا أبطال أفريقيا، إحنا اتأخرنا، من 2010 وإحنا بنكدب، هزيمة السنغال لازم تكون بداية نتعلم من الهزيمة ونبنى على أساس علمى فنى، وكفاية تجار السعادة، المستطيل الكروى أسود أسود أسود وما فيش بطولات جاية وفيه نكسة كروية، من الآخر.. ابنك ساقط ثانوية عامة وأنت بتقول له «يا دكتور»!!.. حرام كفاية، يا جماعة الواد فاشل وآخره معهد صرف صحى وبنقول عليه دكتور، حد يقعد معاه ويفهمه ويعرّفه غلطته، حد يقول لشوقى غريب كفاية أوهام، إحنا دلوقتى كروياً على قدنا، حد يقول لجمال علام هى دى إمكانيات الدورى المصرى الحالى، وكفاية فضايح حرام، حد يقول لخالد عبدالعزيز كفاية حقن بنج أنت مش دكتور تخدير، أنت وزير رياضة.
لازم نعرف أننا بعيدون جداً عن الكرة الأفريقية، مش عيب. من الآخر كده إحنا يا هنتجنن يا هنتجنن، يا ناس حد يفهم معايا، إحنا مش أبطال أفريقيا، ولا عندنا محترفين، ولا عندنا دورى، وعايزين نبدأ من الصفر، انسوا البطولات، انسوا الانتصارات وادعوا معايا يارب نفهم ثقافة الهزيمة، وننسى الفراعنة والأبطال، لأن الواقع مؤلم وهزيمة السنغال هى طوق النجاة، بس المهم نقول إحنا مش الأبطال، أيوه قولوا ورايا «إحنا مش أبطال أفريقيا، إحنا مش أسياد القارة».

تعليقات الفيسبوك

خريطة صفقات الزمالك الجديدة.. أزارو وهداف الدوري
  • سيمبا

    سيمبا

  • -

    :

    -

    08:00 PM

    دوري أبطال إفريقيا
  • الأهلي

    الأهلي

الأكثر قراءة

صفقات الأهلي الجديدة في الميركاتو.. مفاجآت بالجملة