علي ماهر المدير الفني لمنتخب مصر
قال محمود الأسيوطي رئيس نادي الأسيوطي السابق، إنه كسب رهان علي ماهر المدير الفني الحالي لمنتخب مصر، بعدما منحه منذ سنوات فرصة تدريب فريق الأسيوطي.
وكتب محمود الأسيوطي عبر صفحته الرسمية: «دي أول مرة أحكيها النهارده، علي ماهر بقى المدير الفني لمنتخب مصر، الناس كلها بتتكلم عنه دلوقتي، بس محدش يعرف البداية كانت ازاي، البداية كانت في 2017، لما قررت أعيّن علي ماهر مدير فني لنادي الأسيوطي، وقتها الدنيا كلها هاجمتني، وانتقادات مالهاش أول من آخر.. مين علي ماهر ده؟ ازاي تجيب مدرب مالوش تجربة في الدوري الممتاز؟ وأنا ولا فرق معايا لأن اللي شوفته في الاجتماع ده، محدش شافه، واختياره كان بإرادة إلهية والله».
وأضاف: «أنا كان المفروض أسافر النمسا يوم الاجتماع بتاعه مع سيف الأسيوطي ووائل حبيب، وصباح يوم السفر، اكتشفت إن ميعاد سفري كان امبارح مش النهاردة! طلبت أحضر الاجتماع معاهم، وربنا أراد إني أكون موجود، دخل علي ماهر الاجتماع.. لقيت قدّامي مدير فني من كتر الشراسة والحماس عايز ينفجر! منظم في شرح خطة العمل، وبيشتغل بشكل علمي، مش بيهبد».
وواصل: «بالنسبة لي ده كان كفاية، خدت القرار وأنا مطمئن، وماهمنيش أي انتقادات، ولما عرضت عليه مرتب 50 ألف جنيه في الشهر، رد عليّ بالحرف الواحد وقال لي جملة عمري ما هنساها "المرتب ده أنا بصرفه في برامج مشترك فيها.. أنا جاي أكسّر الدنيا، ما بفكرش في الفلوس دلوقتي"، وفعلاً.. كسّر الدنيا، الأسيوطي بقى الحصان الأسود للدوري، وأخرج الأهلي من كأس مصر، والبلد كلها بقت تتكلم عنه، علي ماهر ده راجل لا يعرف الألوان، لا أبيض ولا أحمر».
علي ماهر المدير الفني لمنتخب مصر
واحتتم: «بيلعب بس لنجاحاته الفنية وإنجازاته الشخصية، وعمره ما دخل في صراع الأهلي والزمالك حتى في صفقة محمد عنتر، كان كل همه مصلحة نادي الأسيوطي وبس، وسمحت له يتعاقد مع سموحة قبل نهاية الموسم بـ3 شهور، وبالصدفة بعد أن أخرجنا النادي الأهلي من دور الـ16 اتقابلنا مع نادي سموحة في دور الـ8، ولعب بشرف، وخرجنا بضربات الجزاء.. بآخر ضربة جزاء ضيعها أوكا، النهارده علي ماهر مدرب منتخب مصر، وأنا فخور إني كنت أول واحد آمن بيه، وأول واحد اداله الفرصة الحقيقية في الدوري الممتاز، مبروك يا كابتن علي.. انت تستاهلها، ودي لسه البداية».
تعليقات الفيسبوك