وايت نايتس
أصدرت مجموعة ألتراس "وايت نايتس" الداعمة لنادي الزمالك بيانا رسميا، تعليقا على القبض على عدد من جماهير الزمالك على خلفية أحداث الشغب التي وقعت خلال مباراة فريقها أمام أهلي طرابلس الليبي، في ختام دور المجموعات لبطولة دوري أبطال أفريقيا.
وجاء نص البيان كما يلي:
"بدون مقدمات لأننا مش في وقت مقدمات و كلام لا هيودي ولا هيجيب.
إحنا دلوقتي قدام مأساة حقيقية و كارثة بكل المقاييس، في ٢٣٥ واحد من جمهور الزمالك إتمسكوا بطريقة عشوائية علي خلفية تكسير شوية كراسي و إشعال شماريخ.
ده غير ال ٢٦ مشجع اللى اتقبض عليهم قبل المباراة و أتوجه لهم تهم هزلية لا تمت للواقع بصلة من حيازة تى شيرت مسئ بسبب انه مكتوب عليه ٢٠ شهيد و حيازة استيكر مسئ برضو عليه ٢٠ شهيد !!!!
أيا كان السبب اللي خلي المشكلة دي تحصل، سواء عشان غضب بسبب الخروج من البطولة الأفريقية و سوء مستوي الفريق، أو حتي عشان التعنت و العنف الغير مبرر من الشرطة من أول يوم.
بداية بحبس أي حد معاه طنبور أو طبله مرورا بحبس أشخاص عشان لابسين تيشيرت مكتوب عليه ٢٠ أو استيكر عليه ٢٠، و نهاية بقفل مدرجات التالته يمين و اللي مفيش أي قانون في الدنيا بيمنع الجمهور يدخل أي مدرج في الإستاد طالما معاه تذكرة.
حالة الترصد و الترقب من أول لحظة موجودة ، و أي فرد منتمي للمجموعة كان متجهزله إنه يتقبض عليه قبل الماتش و القضايا بتاعته جاهزة، لكن الخطة مامشيتيش زي ماكانوا راسمين.
خلاص هم دلوقتي في المصيدة و أكيد هيستفزوا أما يعرفوا إن أصحابهم إتمسكوا قبل الماتش، مع الإستفزازات و الضرب جوه الإستاد هيطلعوا بالصورة اللي تبررلنا نبيدهم من غير تفكير.
يا سادة يا كرام في الأول و في الآخر دي كرة قدم و الناس جاية تشجع و تستمتع، لأن اللي عايز يخرب أو ممول و عنده أجنده عنده سكك كتير يسلكها غير مدرجات كرة القدم، اللي بنزورها كل سنة مرة !!!
عشان الأوفياء من جمهور الزمالك اللي إتجددلهم ١٥ يوم بالتهم الجاهزة، و أهاليهم و معاناتهم لازم نتكلم و نقول إن ده مش طبيعي و إن مش دي الحقيقة.
و إن التعامل بالعنف و القسوة دي مش معناها إنك عايز تطبق القانون بالعكس ده أنت أول واحد مش عايز تطبقه و مستفيد من الفوضي و الغضب اللي في الناس، عشان تلاقي مبرر تسجن و تعذب.
ليه دايما الجمهور هو اللي بيتعاقب، لكن اللي بيهدد الجمهور بالقتل و الحبس، و بيرفع جزمته و بيشتم البلد من كبيرها لصغيرها محدش ييجي جنبه.
و علي فكرة الإرهابيين اللي سيادتك حابسهم و عايز تقضي عليهم، رفعوا ماسيج في أول الماتش لإخواتنا الشهداء في رفح ، عشان هم مقدرين مين فعلا اللي بيحمي البلد و مين اللي السلطة هي اللي بتحميه!
الحرية لأشرف جمهور في الكون ، الحرية لجمهور الزمالك ، الحرية ل ٢٦١ مشجع".
تعليقات الفيسبوك