مشجع الأهلي ذوي الاحتيجات الخاصة
اعتاد إسلام محمد، أحد مشجعى الأهلى من ذوى الاحتياجات الخاصة، على الذهاب خلف الفريق الكروى فى كل مبارياته الأخيرة فى بطولتى الدورى والكأس، لحبه الشديد للقلعة الحمراء، على الرغم من مرضه الشديد وعدم قدرته على الحركة، وجلوسه على كرسى متحرك.
وقال «إسلام»: «أعشق الأهلى ومن زمان، وبروح الاستاد وكان حلمى من صغرى أقابل نجوم الأهلى اللى بشوفهم فى التليفزيون»، وواصل عاشق الأهلى: «بدأت أروح الاستاد بشكل متواصل دون انقطاع فى عهد محمود طاهر، رئيس النادى السابق، وما زلت بعد تولى محمود الخطيب لرئاسة المجلس أدخل وأشجع الفريق الذى أعشقه».
أنا نفسى أوجه رسالة لمحمود الخطيب، رئيس النادى، «أنت رئيس مجلس إدارة الأهلى، وعليك حمل كبير، وانت إن شاء الله قدها، عايزين نرجع البطولات الأفريقية زى زمان تانى ونلعب فى المونديال، ونفسى أسافر معاهم كأس العالم للأندية لو صعدنا للبطولة، ده حلمى من زمان ونفسى أحققه».
وعن لاعبى الأهلى وعلاقته بهم قال: «أحمد فتحى ووليد سليمان منحونى تيشيرتاتهم الخاصة، سليمان من أفضل وأحسن الشخصيات اللى ممكن تتعامل معاها، وفتحى أرجل لاعب فى مصر ربنا مع اللعيبة كلها أنا بدعيلهم وإن شاء الله نحقق كل البطولات».
وعن المنتخب الوطنى، قال «إسلام»: «حلم وصول المنتخب إلى كأس العالم تحقق، كان نفسى أشوفهم والحمد لله حصل، عندى إحساس كبير أننا هنعمل نتائج كويسة هناك، إحنا عندنا لعيبة كبيرة جداً وتقدر تعمل حاجة كويسة لبلدنا قدام العالم كله».
كما تحدث «إسلام» عن محمد صلاح، لاعب فريق ليفربول الإنجليزى، قائلاً: «محمد صلاح ده فخر مصر كلها، وأى لاعب محترف فى الخارج ربنا هيكرمه إن شاء الله ينجح نجاح كبير، وأنا حلمى إنى أقابلهم كلهم وأشاركهم فرحتهم ونجاحاتهم».
تعليقات الفيسبوك