محمد عواد
كشف محمد عواد، حارس الفريق الأول بنادي الزمالك، سبب غيابه عن مرماه أثناء مباراة فريقه أمام بيراميدز بنهائي كأس مصر، أمس الأحد، والتي توج بها الفارس الأبيض.
وأبرز كادر اللقاء أثناء إذاعة المباراة غياب حارس الزمالك عن مرماه في الدقيقة (34)، رغم وجود الكرة في المناطق الخلفية لمرمى فريقه، وهو ما أثار دهشة مشاهدي المباراة.
وقال محمد عواد في مداخلة تليفونية لبرنامج الزمالك اليوم: " كنت بكلم محمد عبد الغني ومحمود علاء في وسط الملعب، بصيت عليها مش لاقي نفسي في الكدر بس مش فاكر بالظبط"
وتابع: "الحمد لله، ربنا يعلم كنت مضغوط ازاي الفترة اللى فاتت، وبالأخص الشهر اللى فات، كان فيه توفيق كبير من ربنا في جميع قراراتي بالمباراة".
وأضاف: "مبروك للجهاز الفني ومجلس الإدارة واللاعبين والجمهور العظيم اللى كان بيساندنا، خلاص الواحد ارتاح، هحتفل بكرة مع أهلي ومراتي وابني، وابدأ أجهز تاني للمباراة القادمة".
وأكمل: "الحمد لله أول بطولة ليا، وإن شاء الله عندنا مباراة السوبر يوم 20 وبعد كدة السوبر الإفريقي، ربنا يكرمنا مع الجهاز والمجلس واللاعيبة ونقدر نفرح جمهور الزمالك، وكل مباراة هلعبها داخل الزمالك تُعتبر بطولة".
وعن التصدي لتسديدة إبراهيم حسن خلال اللقاء: " كنت لسة بتكلم في الكورة دي مع فرجاني ساسي، أنا كنت بتمرن مع إبراهيم حسن ولعبت معاه كتير، أول قرار بيفكر فيه أول ما يدخل منطقة الـ 18 بيكون التسديد في الزاوية الضيقة، وكنت واخد القرار وهو بيشوط انه هيحطها في الضيقة، وبعد كدة كنت واخد قرار تاني انه هيسددها في الزاية البعيدة، ولكن إبراهيم بيعمل دي قليل جدًا، والحمد لله كان توفيق كبير من ربنا وقدرت اتصدي للتسديدة في أخر لحظة".
ونجح الزمالك في حصد بطولة كأس مصر للمرة رقم 27 في تاريخه، وذلك عقب انتصاره على نظيره بيراميدز بثلاثة أهداف نظيفة، في نهائي البطولة الأعرق في تاريخ كرة القدم المصرية، في المواجهة التي جمعت الجانبين على ملعب "برج العرب".
سجل ثلاثية الزمالك، المغربي أشرف بن شرقي هدفين، ويوسف أوباما هدف وحيد.
تعليقات الفيسبوك