أمير مرتضى عن زيزو: جروس لم يقتنع بمستواه.. وذليته بعد ما كسبت رهاني عليه

أخبار متعلقة

زيزو: الزمالك الأقرب للفوز بالدوري.. ومكنتش مصدق اللي بيحصل في السوبر

زيزو: الأهلي كلمني قبل التوقيع للزمالك.. وشرف ليا ألعب لـ"الفن والهندسة"

"ساسى" يمنح الزمالك مهلة للحصول على مستحقاته

ميتشو يشرح للاعبي الزمالك البرنامج التدريبي في معسكر أكتوبر

أكد أمير مرتضى، المشرف العام على الكرة بنادي الزمالك، أن السويسري كريستيان جروس، المدير الفني السابق للفريق الأول، لم يقتنع بمستوى أحمد سيد زيزو بعد ضمه في يناير الماضي.

وقال أمير مرتضى، في مداخلة مع الإعلامي سيف زاهر، عبر قناة أون سبورت: "وكيل زيزو نفس وكيل مستر جروس، وقولت لوكيله أنا مقتنع بيه 100%، بس كنت خايف أجيبه والمدرب مش محتاجه، وزيزو ساعتها قالي أنا عاوز أقعد مع المدرب ومن حقكم تقتنعوا وانتوا بتشتروا لاعب، وجروس لم يقتنع به، وقالي شخصيته طيب، قعدت أقنعه قالي أنا شايف إن اللاعب اللى هيدخل على الفرقة لازم يصنع الفرق".

وتابع: "قعدت مع أحمد ووالدته بعدها وقولتله أنت عليك مسؤولية كبيرة، وجروس قال عليك لاعب كويس لكن مش محتاجك الفترة دي، وده معناه إن مشاركتك صعبة وقيدك في أفريقيا صعب، وساعتها قالي بثقة وهدوء أنت عملت اللى عليك وجبتني الزمالك والباقي عليا أنا في وقت قليل هتلاقيني في الملعب وبساعد وبكسب الفريق، بعدها جروس أشركه أساسي وعمل أسيسيت في لقاء إنبي، وبعد كدة أسيسيت لحميد أحداد في مباراة بترو أتلتيكو الأنجولي".

وأضاف: "جروس كان بيعتمد على طرفين فقط وهم كهربا وإبراهيم حسن، زيزو كان قد المسؤولية لعب يمين وشمال ووسط ملعب، ودخل على ماتشات كبيرة في أفريقيا برة أرضنا وظهر كأنه في الفريق من 4 سنوات، وإن شاء الله انضمامه للمنتخب ميبقاش معسكر فقط ويكون له دور دائمًا مع الفراعنة".

وأكمل: "زيزو كان نقطة تحول كبيرة في علاقتي مع مستر جروس، لأنه كان شايف إن خبرتي في الكورة قليلة، وبقيت بذله بعد كدة بسبب رهاني على زيزو".  

أمير مرتضى: أنا أسعد واحد بانضمام زيزو للمنتخب

وعن انضمام "زيزو" لمنتخب مصر لأول مرة، تحت قيادة حسام البدري، خلال معسكر شهر نوفمبر الجاري، الذي سينطلق يوم 6: "أنا أكتر واحد سعيد بانضمام زيزو للمنتخب، لأنه يستحق، ومبسوط إن بشوفه على التليفزيون عن طريق نادي الزمالك، وأنا أول واحد قابلته قبل ما يجي وأعرضه على المدرب ومجلس الإدارة".

وأتم: "زيزو عنده شخصية كبيرة رغم صغر سنه، ورغم عدم لعبه في مصر من قبل حتى على مستوى الناشئين، من اللاعيبة القلائل التي تعامل كمحترف، بيحب يعرف اللى ليه وعليه، ويستاهل أكتر من كدة، واللى قدمه 30 أو 40% فقط من مستواه، كان عنده شوية حاجات عاوزة تتعدل وبالفعل اشتغل عليها، زي إنه يكون إيجابي على الجول، وهو جيه في وقت صعب في يناير الماضي".

وأنهى حديثه قائلًا: "زيزو تحديدًا كان رهان كبير بالنسبالي، كنت لسة ماسك بقالي 4 شهور، وكانت أول مرة نشتغل بالطريقة دي، وكان العرف إن نتعاقد مع لاعبين في السوق وظاهرين مثل الدوري ووكلاء اللاعبين".