علق الكابتن أحمد بلال لاعب النادي الأهلي ومنتخب مصر السابق، على انتقال لاعب الأهلي السابق رمضان صبحي لصفوف بيراميدز، ساخرًا: "مين رمضان صبحي أنا معرفوش".
وقال "بلال"، خلال مداخلة هاتفية مع الإعلامي وائل الإبراشي في برنامج "التاسعة"، المذاع عبر القناة الأولى المصرية: "طالما اتربيت في النادي، والنادي له فضل عليك في كل حاجة، وسمح لك بخوض تجربة احترافية كنت بتتمناها من بدري، كان من الطبيعي ومن احترام النادي عليك ان انت لو مش عايز تلعب، ترفع ايدك يا جماعة أنا مش هقدر أكمل في النادي الأهلي، أنا مش عايز اتفاوض أنا هشوف سكة احتراف جوة أو برة مصر، لكن تقعد مع المسؤولين، وتتكلم في أرقام وحب النادي، وتوهم الجماهير بحب وانتماء وتقعد تتفاوض وفي الآخر تقول أنا آسف مش هقدر أكمل، وده شيء أعتقد أنه نوع من أنواع عدم تقدير الجماهير، وعدم تقدير للنادي الأهلي نفسه".
وأضاف: "احترف كما شئت، ولما حب يخوض تجربة الاحتراف في البداية محدش في النادي وقف قدامه لكن النادي دعمه".
واعتبر بلال، أن ما فعله رمضان صبحي هو خيانة للجماهير "رمضان صبحي المفترض انه محسوب على النادي الأهلي كابن من أبناء النادي الأهلي، ومش لعيب عادي يعني، لعيب زي عبدالله السعيد الموضوع مكنش فارق، لانه مش ابن من أبناء النادي الأهلي".
وتابع: "رمضان الموضوع مختلف، وانت كرمضان لما تطلع تقول انا ابن من أبناء النادي الأهلي، والأهلي له خير عليا، وتقول ان عودتي هتكون حتما للنادي الأهلي، وأنت كده بتلعب على مشاعر الجماهير، لكن أنت تعامل كلاعب محترف، وقول لهم أنا لاعب محترف، وهشوف مصلحتي فين".
وأكد أنه من حقه، أن يحترف وأن يبحث عن مصلحته، وأن المشكلة هو تصديره للناس مسألة الحب والانتماء والأمر مختلف تمامًا عندك: "اللي يعنينا أنك تبقى واضح مع الناس وضوح الشمس"، معتبرًا أنه تلاعب بالنادي الأهلي.
تعليقات الفيسبوك