رحاب جمعة لـ"رمضان": الأهلي رجعك وأنت مشطب.. وانتقالك لبيراميدز خيانة
12:40 م | الثلاثاء 08 سبتمبر 2020
رمضان صبحي لاعب بيراميدز
شنّت رحاب جمعة، المحترفة في صفوف فريق سان جينيان الفرنسي لكرة اليد، هجوما حادا على رمضان صبحي لاعب الأهلي السابق، والمنتقل حديثا إلى صفوف بيراميدز.
وقالت رحاب جمعة في تصريحاتها ببرنامج "التاسعة" الذي يقدمه الإعلامي وائل الإبراشي على قناة "مصر الأولى": "ده بيقول أنا سبت الأهلي عشان الاحتراف، احتراف أيه اللي بتتكلم عنه، هو مصر فيها احتراف، إحنا هنضحك على بعض".
وأضافت: "أنت قولت عايز أحترف والأهلي خلاك تروح انجلترا، وفشلت والأهلي رجعك ووقفك على رجلك، ولما بدأت تشم نفسك بسبب الأهلي، بدأ يتفاوض برا، ده مش حقه طبعا".
وواصلت: "إنت كنت مشطب كورة، والأهلي هو اللي رجعك لمستواك، مسؤولين النادي يقولولك أنت معانا فتقولهم أيوة، تروح تتفاوض مع بيراميدز من وراهم وتلعب على الطرفين".
وتابعت: "إزاي تقعد مع كابتن محمود الخطيب والناس الكبيرة دي وبعدين تتفاوض من وراهم، متقوليش اتفاوضت مع بيراميدز في 4 أيام، دي خيانة، احتراف أيه اللي بتتكلم عنه، ده إنت كنت طفل والأهلي اللي عملك".
وأردفت: "إنت بتعض الإيد اللي اتمدتلك، دي قلة أصل، أنت كنت دكة ومشطب، بس إحنا الأهلي، يمشي لاعب ونجيب عشرة، هي للدرجادي الفلوس بتعمي عيون الناس؟، الفلوس بتروح وتييجي، اللي بيقعد السمعة وحب الناس".
هو عقله كان فين؟
واستطردت: "الاحتراف ده لو هيكمل في أوروبا مثلًا، بيراميدز إيه اللي احتراف؟ دي شركة قطاع خاص كمان كام سنة مش هنلاقيها".
واختتمت: "هو عقله كان فين؟ محدش عقله؟ الفلوس بتروح وتييجي يا جماعة، هو الأهلي مجوعه يعني؟، هو في لاعب مصري بـ200 مليون، ده أبو تريكة وبركات مكانش فيه الكلام ده أيامهم".
وكان نادي بيراميدز أعلن تعاقده مع رمضان صبحي، أمس الإثنين، قادما من نادي هيدرسفيلد الإنجليزي، بعقد يمتد لخمسة مواسم.
تعليقات الفيسبوك