عبدالعال: لو كنت واجهت كارتيرون لهزمته.. و"كلامي عن التحكيم هيوقفني"
11:02 م | الثلاثاء 22 سبتمبر 2020
رضا عبدالعال المدير الفني لفريق طنطا
أعرب المدير الفني لفريق طنطا، رضا عبدالعال عن رضاه التام عن آداء لاعبيه رغم الخسارة أمام الزمالك بنتيجة 3-1، اليوم الثلاثاء، بالجولة الـ29 من بطولة الدوري المصري الممتاز.
وقال رضا عبدالعال خلال المؤتمر الصحفي الذي أعقب اللقاء: الحمدلله وأشكر اللاعبين على الآداء الكبير الذي قدموه اليوم بغض النظر عن النتيجة، الزمالك إنه يكسب طنطا بالشكل ده كان بفضل مجهود كبير مني، خاصة وأنا عندي غيابات فرقت كتير في منطقة الهجوم، وفرقت جدًا في الأداء.
وأضاف مدرب طنطا: كنت هلعب بطريقة تانيه يادوب 25 دقيقة لقيت اللاعيبة وقعت مني معملوش استشفاء، أنا النهاردة معملتش حاجة أنا بتعامل مع اللاعيبة نفسيا، وباعذر اللاعيبة لأنهم مش قادرين يشيوا رجليهم من الأرض.
وتابع: في أندية اتظلمت بعد كورونا، زي طنطا لأن كان عندها أكتر من 15 حالة، وفي 4 لاعبين كان عندهم كورونا من كام يوم ونتيجة المسحة ظهرت النهاردة لو كان عندهم حاجة أنا كنت عملت إيه بقى؟!.
رضا عبد العال: "طنطا والإسماعيلي والمصري أكتر لاعيبة اتظلموا"
وأردف "عبدالعال": طنطا والإسماعيلي والمصري اكتر لاعيبة اتظلموا.
وعن لقطته الطريفة بارتداء الكمامة على وجهه، قال: أنا كنت حاطط الكمامة كدة لأني كنت خايف يكون اللي جنبي عنده كورونا.
وأكمل: لاعبي طنطا عندهم إرهاق بدني، ولعبت بنفس طريقة الفريق المعتادة لإني ملحقتش أنفذ التكتيك الخاص بي، وكنت محدد لاعيبة معينه تمسك لاعيبة الزمالك ولكن التعب هو اللي فرق الشوط التاني، كمان أنا اشتغلت على جانب أعرض نفسك واكسب عشان الدنيا تمشي، ولو اتكلمت عن التحكيم هتوقف.
ورد "عبالعال" بسخرية على سؤال لماذا تخاطر باسمك بتدريب طنطا في هذا الوقت الصعب، قائلًا: هو أنا كنت بدري منتخب مصر؟!، الناس هتلاقي طنطا بشكل تاني خالص وقت ما اللاعيبة عددها يكمل، ومفيش مخاطرة ولا حاجة.
وأتم: أنا قولت لما كنت موجود في الاستديو التحليلي إن طنطا هيهبط، أنا بشكر كل جماهير مصر السوشيال ميديا كلها كانت بتتكلم على رضا عبد العال، ولو كارتيرون كان موجود كنت كسبته والله، أهو شال 6 امبارح مع التعاون ومش هيكمل 4 أيام هناك، لاعبي الزمالك هي التي كانت تقوم بكل شيء.
تعليقات الفيسبوك