أحمد فتحي
وجه أحمد فتحي نجم منتخب مصر، رسالة لجمهور الأهلي، عقب رحيله من النادي الأهلي والانتقال لصفوف نادي بيراميدز، بعدما كشفت إدارة الفريق السماوي الإعلان عن الصفقة غدا الاثنين.
ونشر فتحي عبر حسابه الشخصي بموقع التواصل الاجتماعي "فيسبوك"، قائلًا: لحظات يصعب فيها الكلام، لحظات يصعب فيها التعبير، خاصة وأنت بتخاطب أطراف كلها عزيزة عليك ولها مكانة خاصة في قلبك.
وأضاف: "عشت معاهم أحلى 12 سنة في حياتي، 12 سنة كلها انتصارات وبطولات وأفراح وعايز أقول لو عقود الاحتراف المكتوبة بتنتهى فإن عقود الحب والود والاحترام بيني وبين كل منظومة النادي الأهلي لن تنته.
وواصل: "أعذروني لحظات قاسية، وأي قسوة وأنت تغادر حبايبك اللي قضيت معاهم سنين في النادي الأهلي بيتي وهيفضل بيتي، حتى لو كان القدر كتب لي خطوة جديدة، وهيفضل جمهور الأهلي اللي حبني وساعدني ووقف جنبي، هيفضل سندي.. لأنه جمهور وفي.. جمهور أصيل.. ربنا يشهد إني لم أقصر لحظه لا في حق النادي، ولا حق جمهوره، وبذلت أقصي ما أملك حتى آخر لحظة، وأتمنى أكون قدمت ولو جزء من اللي يستحقه الأهلي وجمهوره".
وأضاف "فتحي": "هذه اللحظة الصعبة على نفسي، عايز أسجل شكري للنادي الأهلي وإدارته وعلى رأسها المحترم الكابتن محمود الخطيب، وكل الشكر للجماهير اللي مهما تكلمت مش هقدر أعطيها حقها، شكرا لكل المدربين اللي ساعدوني من أول يوم، وحتي آخر لحظة، والشكر لكل زمايلي اللعيبة، اللي أنا لعبت معاهم على مدار كل الأجيال، شكرا لإخواتي الأطباء ومساعديهم أخصائيين التأهيل والمدلكين، شكرا للإداريين والعمال، شكرا لكل فرد ساعدني ولو بأي حاجة، أنا مش عايز حد يزعل مني، في الأول والآخر دي خطوات كتبها ربنا سبحانه وتعالى، وأنا متوكل على الله في كل خطواتي، ودايمًا هيفضل الأهلي وجمهوره في قلبي".
تعليقات الفيسبوك