إسلام حسن وكريم هنداوي
حملة دعم قادها عدد من اللاعبين والمدربين، للاعب إسلام حسن قائد فريق كرة اليد بالنادي الأهلي، بعد قراره المفاجئ باعتزال اللعب الدولي، بعد أيامٍ من إسدال الستار على بطولة العالم لكرة اليد، التي أقيمت في مصر مؤخراً، وحصد المركز السابع على العالم، لتكون آخر بطولاته الدولية رفقة المنتخب الوطني بعد فترة عطاء استمرت 14 عاماً مع المنتخب الأول.
كان أول الداعمين، هو كريم هنداوي حارس مرمى المنتخب الوطني والمحترف في صفوف فريق يوروفارم المقدوني، الذي نشر صوراً تجمعه بإسلام حسن على مدار سنوات، خاصةً وأنهما من نفس الجيل، وذلك عبر حسابه على موقع الصور الشهير «انستجرام».
وعلق كاتونجا على الصور قائلاً: «الموضوع مش مجرد لاعب واعتزل دولي، الموضوع رحله بدأناها مع بعض من أكثر من 17 سنة عشنا فيها كل اللحظات، الفرح والحزن والتوتر والقلق والانتصار والهزيمة، تعبنا فيهم قوي وكان دايما هو اللي بيهون وجودنا مع بعض وفي ضهر بعض».
وأضاف: «موت نفسك وعمرك ما بخلت بأي وقت أو مجهود، ضحيت بحاجات كتير كان عندك أحلام كتيرة و الحمدالله حققتها، أنا متأكد إن ربنا كاتبلك الخير وهيكرمك لأنك إنسان وأخ وصاحب جدع ومجتهد، أسف يا صاحبي لو كنت يوم قصرت معاك ومقدرتش أساعدك، أسف على كل لحظة صعبة عشتها ومعرفتش أهونها عليك، بتمنى لك الخير في الجاي وبإذن الله من نجاح لنجاح أكبر».
وكتبت رنا عمار لاعبة المنتخب الوطني للشابات مواليد 1998 قائلة: «تقريبا طموحي بدأ في اللعبة دى من إسلام حسن ..كنت بتفرج عليه من قبل 2009 وبدأت أفهم يعنى إيه يكون عندي مثل أعلى ونموذج، اجتهاده فى الملعب و شخصيته وطموحه اداني دافع أحاول اتعلم منه حاجة.. يمكن دي حاجة ممكن اللاعيبة الكبيرة متكونش عارفاها، بس بجد انتوا شرف لينا وبنتعلم من كل واحد منكوا حاجة، اللى بالنسبالكوا ممكن متاخدوش بالكوا منها».
وأضافت: «فكرة إن إسلام حسن مكنش يعتبر ليه مشاركة في كأس العالم كانت مضايقاني جدا، وحتى لما حصل انتقاد عليه بقيت بجد بديله أعذار كأني مكانه .. مهما الظروف اللى مأثرة على مستواه فأنا مؤمنة جدا إن الشخص ده لازم يرجع لمستواه وشخصيته اللى عاشت جوايا من صغرى هتفضل موجودة .. فقرار اعتزالك دولياً يمكن من وجهة نظرك ومن وجهة نظر ناس كتير إنك مش في مستواك، بس هستنى إن يرجع مستواه وأحسن وأشوفه تاني في الماتشات، د في كل الأحوال محتاجة أشكره على تأثيره عليا في الرياضة حتى لو لفترة صغيرة، ونظرتي ليه دايما كانت أحد أسباب معرفة قيمة نفسي دلوقتي».
وكتب الإعلامي هيثم السعيد لاعب فريق كرة السلة السابق بالقلعة الحمراء: «أتمني ليك كل التوفيق، إسلام حسن نجم كبير وخلوق، وأتمني أن تعدل عن قرارك»، في الوقت الذي كتب أشرف الفار مدرب الأهلي: «نجم فوق العادة، بطل مصر والنادي الأهلي، شخصية جميلة وقيادة ولاعب مؤثر في تاريخ كرة اليد، صاحب العديد من البطولات العربية والإفريقية والدولية، ربنا يوفقك دائما».
وأعلن إسلام حسن، قائد فريق كرة اليد بالنادي الأهلي والمنتخب الوطني اعتزاله اللعب الدولي، بعد سنوات طويلة في صفوف الفراعنة، عقب انتهاء فعاليات بطولة العالم التي أقيمت مؤخرًا في مصر، وحصد خلالها المنتخب الوطني المركز السابع، وذلك خلال استضافته في قناة الأهلي، أمس الأحد.
تعليقات الفيسبوك