منتخب مصر للكرة الشاطئية
علقت دعاء الغباشي لاعبة منتخب مصر للكرة الطائرة الشاطئية على قرار اللجنة المنظمة للتصفيات الأفريقية للكرة الطائرة الشاطئية، بشأن استبعاد مصر من استكمال التصفيات، بسبب اكتشاف حالة كورونا لمدرب الفريق أحمد عبد الله، وفقا لما أعلنته اللجنة بعد إجراء مسحة جديدة، والإعلان عن نتيجتها قبل ساعات من مباراة نصف النهائي.
دعاء الغباشي، كتبت مؤخرا عبر صفتحها الشخصية على موقع التواصل الاجتماعى فيس بوك: «بكل هدوء إحنا لاعيبة حلمنا من 2016 التأهل للأولمبياد، وبقالنا 5 سنوات بنتمرن عشان البطولة دي تيجي وتكون في المغرب اللي هي البلد المنافس أصلا، عملنا مسحة قبل ما نسافر طلعت سلبي، ومسحة أول ما وصلنا وبرضه طلعت سلبي، وقايلين كلهم إن أغادير مفهاش كورونا وإنهم بيعملوا كده عشان يحافظوا على البلد، أول ما وصلنا اتعمل مسحة وفضلنا 3 أيام في الغرف عشان النتيجه تطلع، ومرضيوش يخرجونا من الأوضة غير أما النتيجة تطلع، وطلعت سلبي الحمد لله من 3 أيام».
وأضافت: «فجأة قالوا كله ينزل يعمل مسحة، مع إنهم أصلا مكانوش قايلين إن في مسحة هتتعمل تاني عشان المفروض إننا في فقاعة في فندق فيه 100 ألف شخص ونصهم سياح برة البطولة، إمبارح الساعة 11 بليل بتوقيت مصر قالوا مصر متخرجش برة الأوض، عندهم حالة، إزاي وامتى وكلنا كويسين؟، قلنالهم مين؟، قالوا مدرب فرقة الرجال، طب هنعمل إيه يا جماعة، قالوا هنلعب لحد ما اللجنة الطبية تاخد قرار، ماتشنا النهاردة الساعة 9 الصبح، طبعا نمنا كلنا اللاعيبة بعد ما اتاكدنا إننا هنلعب بعد توتر وعياط وصويت، فجأة نصحى على رسالة الساعة 3:30 بتوقيت مصر 4:30 متخرجوش من الأوض انتو برة البطولة».
وواصلت: «يرضي مين دة يا عالم يرضي مين؟، دي لعبة وإحنا متأكدين منها، المدرب سليم ومع العلم ممنوع حتى نجيب حد يعملنا مسحات تانية، ولا حتي فكروا يعيدوا المسحة، ولا أصلا شوفنا ورق المدرب اللي بيقولوا إنه إيجابي، إحنا ماتشنا الساعة 9 الصبح، يعني كام ساعة ماتش ضمنين نكسبه نكون في النهائي، إحنا مخالطين جميع اللعيبة ومخالطين فرقة المغرب والفرق اللي لعبناها والحكام والناس اللي في المدرجات اللي هما منظمين، إحنا مخالطين رئيسة الاتحاد الأفريقي اللي هي رئيسة اتحاد المغرب أصلا، يعني لو في فعلا حق يبقى المنتخبات كلها يتعملها مسحة، إشمعنى مصر هي اللي إيجابي ولو إيجابي هتبقى إيجابي من مين؟، من نفسها يعني؟، حد يلحقنا والنبي إحنا حلمنا فجأة بقي تراب ومش عارفين نعمل حاجة، يارب انت حسبي ونعم الوكيل».
يذكر أنه كان من المقرر أن يلتقي منتخب سيدات الكرة الطائرة الشاطئية، مع نظيره منتخب نيجيريا، في إطار منافسات نصف نهائي التصفيات الأفريقية القارية المؤهلة لأولمبياد طوكيو 2021.
تعليقات الفيسبوك