أزمة بين إبراهيم سعيد وأحمد عيد تشعل مواقع التواصل الإجتماعي
شن إبراهيم سعيد، لاعب الأهلي والزمالك السابق، هجوما على أحمد عيد عبدالملك، مهاجم الأبيض السابق، بعد هجوم الأخير عليه، بعد انتقاده لأداء مصطفى فتحي، نجم القلعة البيضاء، خلال مباراة غزل المحلة التي أقيمت أمس، في الجولة الثامنة للدوري الممتاز، والتي انتهت برباعية نظيفة لصالح أبناء ميت عقبة.
وقال «سعيد» خلال مداخلته في «لايف» مع «الوطن»، إن هناك حالة غريبة يمر بها مع جماهير الزمالك، خلال الفترة الأخيرة، رغم احترامه الكبير لهم.
وأوضح اللاعب السابق: «بقالي 5 سنين بنتقد لاعبين في الأهلي وزمالك ومنتخب مصر، وفي الفترة الأخيرة اتكلمت بوجهة نظري وعمرى ما بزعل من النقد، لكن يوصل لأهلي وشخصي ده اللي بيزعل، خاصةً أني في الفترة الأخيرة بتعلم من أخطائي وبحاول أطور من نفسي».
وأضاف إبراهيم سعيد: «أنا بتكلم كورة، أنا أكتر واحد اتكلم وساند الزمالك خلال السنوات اللي فاتت، وعمري ما استنيت منصب، اتعرض عليا قطاع الناشئين في الزمالك والعمل في قناة الزمالك واعتذرت، لأني محبش أبقى مقيد، وأحب يبقى عندي حرية الرأي والتعبير».
وتابع لاعب القلعة الحمراء السابق: «اختلفت مع جمهور الأهلي كتير، لكن الاختلاف كان فني، لكن جمهور الزمالك دخل معايا في حتة برا الكرة وبدأ يتعرض ليا ولحياتي وأهلي».
وعن أحمد عيد عبد الملك، قال: «أحمد صديق ملاعب، وفي الأول والآخر ممكن نختلف فنيا بس اللي يزعلك إنه بيحاول ياخد بونط على حسابي ويظهر في صورة المدافع ورمز الانتماء، مع إنه أكتر واحد لما اتسأل قال إن البطولات هي الأهلي وجماهيره بتهز الصخر، وشرف ليا إن ألعب للأهلي، لكن دلوقتي مصلحته مع الزمالك».
وأضاف «سعيد»: «ممكن يكون عايز يمسك منصب أو عايز يبقى في القناة، وممكن برضه يكون عايز حديقة باسمه، خاصةً إن اللي هو بيعمله مش أقل من الناس اللي اتكتب حاجات باسمها داخل النادي، وهو بيقاتل عشان يتكتب حاجة باسمه، خاصةً إنه محسوب على الزمالك ومفيش حتة تانية يشتغل فيها».
وأوضح: «أما أنا بالنسبالي مليش مصلحة لا أهلي ولا زمالك ولا اتحاد كورة ولا عايز منصب ولا بحب أقعد على مكتب وأحب أبقى حر نفسي، أنا بتكلم كورة بعيد عن الانتماءات».
واستطرد: «أنا ياما انتقدت أسماء كبيرة في الأهلي، لازم نحترم الاختلاف والانتقاد، ناس كتير بتختلف معايا بس بيتكلموا كورة مش بضايق طالما في إطار الكورة له كل تقدير واحترام، لكن خارج الكرة بعتبره أسلوب متدني جدا».
وأبدى إبراهيم سعيد رأيه في إطلاق أسماء نجوم الكرة على حدائق نادي الزمالك، قائلا: «نادي الزمالك أكبر من قصة الحدائق، أتمنى إن مجلس الإدارة يركز مع فريق الكرة مش بالحدائق والأسماء، بمين اللي بيحب الكيان ومين عايز يخدمه، لكن للأسف كل اللي بيحصل داخل الزمالك مصالح شخصية، بيطلعوا على تويتر ويلبسوا التيشيرت ويغنوا باسمه عشان مصلحتهم، مجرد شعارات مفيش أفعال، علشان كده النادي في أزمات علطول، لكن اللي بيدافع عن الزمالك هو جمهور النادي فقط».
واختتم: «أنا بحترم الزمالك وجمهوره، لكن أنا ابن من أبناء الأهلي وأتشرف بذلك، وبقول تاني أنا مش عايز أشتغل في الأهلي أو الزمالك، أنا حر نفسي ومليش مصلحة مع حد».
تعليقات الفيسبوك