مرتضى لمجلس الأهلي: كفاية قضايا.. ولو كهربا مدفعش الفلوس هحجز على هدومه

أخبار متعلقة

مرتضى منصور: أتمنى فوز الأهلي على الرجاء.. وعندنا 90 مليون في الخزنة

مرتضى منصور يعلن قبول استقالة مصطفى هدهود من منصبه في الزمالك

عاجل.. مرتضى منصور: سنعلن القرار الخاص بمصطفى هدهود عقب مباراة المقاصة

مرتضى منصور يفتتح دورة رمضانية داخل نادي الزمالك

قدم مرتضى منصور رئيس مجلس إدارة نادي الزمالك، شكره لجماهير القلعة البيضاء، خلال احتفالية النادي ببطولات ألعاب الصالات. 

وقال مرتضى منصور: «بشكر جمهور الزمالك الداعم والمساند الحقيقي والرمز الحقيقي لنادي الزمالك لان الزمالك ليس له رمز».

مرتضى منصور يوجه رسالة لمجلس الأهلي

وأكمل رئيس الزمالك:«رسالة مني لمجلس إدارة الأهلي وأنا كسبان كل القضايا.. بقولكم كفاية عشان مصر وصالح البلد تعالوا نحط إيدينا في إيد بعض.. مصر مش ناقصة فتنة الفترة دي، توجيهاتي لقناة الزمالك بعد استلامها ملكيش دعوة بالأهلي ولو حصل والأهلي جاب سيرتي بحذر مرة واتنين ولكن التالتة أنا بقى هرد، الأخ اللي بيقول أنا قولت هو شيكابالا راح ماتش السلة ليه بطل فبركة ما هو راح الماتش اللي بعده ده لما حب يستخبى مني استخبى في فيلتي في مراسي». 

صرف 70 ألف جنيه لفريق الطائرة

وأكمل مرتضى منصور تصريحاته خلال الاحتفالية قائلا:«نصرف 70 ألف جنيه غدا مكافأة الفوز بالدوري لفريق الطائرة، وربنا يكرمكم بكرة في ماتش الكأس وبعد ما تخلصوا الماتش هتاخدوا مكافأة الدوري وأتمنى يبقى معاها مكافاة كأس، وبشكر فريق الطايرة كله وبشكر أحمد مرتضى اللي جاب 3 صفقات قوية في وقت قياسي، وابن صاحب العزبة بقيت أحب الكلمة دي أوي، صاحب العزبة في كرة السلة، يرضيكم أن أنس أسامة يروح نادي تاني غير الزمالك وأنس رد قال لا ومرتضى رد قال خلاص هو قاعد، فريق السلة وصل بطولة افريقيا». 

                           احتفالية الزمالك

وتابع: «الناس بتقول إن دوري السلة كان الموسم الماضي طيب هو مين لاعب جديد جه؟.. ما هو فريقي، فيه صفقتين سوبر جايين ولن نبخل على أي لعبة في النادي كرة اليد، أحمد الأحمر كان في قطر وممدوح عباس سرح اللعيبة استلمت الفريق وكان بيلعب ماتش للهبوط ومن ساعة ما استلمته عدوا البطولات، المكافاة بتاعتهم هتتصرف بكرة وأكتر من اللائحة، النادي فيه فلوس بس مش هسدد فلوس لحد كان له فلوس من أيام اللجان المعينة كرة القدم، استلمنا النادي مفيهوش جنيه وكان مديون للضرائب ولمؤسسات كتير جدا، كان فيه خراب، ولسة مخدناش فلوسنا من الشركة الراعية ولا خدنا فلوسنا من البنك الأهلي ولسة البنك التجاري الدولي ولسة العضويات، مش كل ما هحوش فلوس هسددها للجان تيجي تدين النادي، صرفنا لفريق الكرة 16 مليون جنيه وبعد ماتش المصري هيصرفوا باقي الفلوس ده حقهم حتى اللي هيمشي، قريت في إحدى الصحف أن بن شرقي رفض عرض الزمالك هو حضرتك مش إحنا أغلقنا ملف التفاوض؟.. مش هزعل من محترف ممكن أزعل من ابن النادي لو عمل زيه يعني شيكابالا أو حازم».

مرتضى منصور: لو كهربا مدفعش الفلوس هحجز على كل قطعة في ملابسه

وتابع مرتضى تصريحاته قائلا: «الدوري لسة طويل ودلوقتي إحنا راكبين الدوري.. هنيئا لجمهور الزمالك لأول مرة حدث عالمي يبقى فيه 4 دروع للـ4 ألعاب، شكرا للاعيبة والأجهزة، من حقك تبقى أهلاوي بس مش من حقك تشجع الأهلي وإنت جوه الزمالك وهعمل اختبارات مرة وهذيع ماتشات للأهلي واللي هيقول هييه هشطبه، مش ضد التحفيل من جمهور الزمالك ولكني ضد شتيمة الأهلي أو أي من منتميه.. إحنا بنقول عيب لكن غيري مش بيقول عيب.. هكسبكم في القضايا والبطولات المحلية والقارية».

وعن العقوبة التي أقرها الفيفا للنادي ضد لاعبه السابق محمود عبدالمنعم كهربا، قال: «ولو كهربا مدفعش الفلوس هحجز على كل قطعة في ملابسك ومش هسيب لك جنيه من العقوبة والعداد بيعد النهاردة 45 مليون جنيه بكرة يبقوا 50 في 5%؜ فائدة وكل يوم الفلوس بتزيد، وهنمضي مع الشركة الوطنية لانشاء ستاد الزمالك وهيبقى اسمه ستاد الزمالك مش ستاد مرتضى لأن الزمالك اكبر من مرتضى 100 مرة».