ماركوس راشفورد نجم مانشستر يونايتد
كشف أحمد يحيى، رئيس رابطة مشجعي مانشستر يونايتد في مصر، عن براءة أحد المشجعين المصريين من تهمة سب ماركوس راشفورد، نجم كتيبة الشياطين الحمر والمنتخب الإنجليزي، وذلك عقب الأنباء التي تداولت عن رفع اللاعب الإنجليزي لقضية على مواطن مصري من محافظة الشرقية، موضحا أن إدارة مانشستر يونايتد تتخذ إجراءات قانونية لمنع الجماهير من الإساءة اللفظية أو العنصرية لأي من لاعبي الفريق أو عائلاتهم، مشيرا إلى أن القضية التي تم رفعها جاءت من قبل وكلاء اللاعب الشاب بتوجيه من إدارة النادي الإنجليزي.
وكتب أحمد خالد يحيى، رئيس رابطة مشجعي مانشستر يونايتد في مصر، عبر حسابه الشخصي على موقع التواصل الاجتماعي «فيس بوك»: «بخصوص ما يتم تداوله من الإعلام والميديا في مصر إمبارح والنهاردة إن راشفورد رفع قضية على مشجع مانشيستراوي مصري من الشرقية، فأنا مش جي أنكر ده وإنما أوضحه، الموضوع قديم من السنة اللي فاتت، والراجل مشجع وقت زهق ومشتمش اللعيب، وده ما تم إثباته!».
ماركوس راشفورد نجم مانشستر يونايتد
وأضاف: «السنة اللي فاتت كان فيه شتايم للعيبة كتير والنادي كان مركز ضد أي إساءة وحاولوا ياخدوا إجراءات قانونية حول العالم كله لمنع الجمهور من الإساءة اللفظية والعنصرية ضد اللعيبة وعائلتهم، راشفورد مرفعش حاجة وإنما الوكلاء بتوعه والشركة اللي ماسكة الأكونت هما اللي عملوا القضية بتوجيه من النادي، ووكلوا محامي دولي بالقضية».
وتابع: «بالنسبالي لما وصلي الحوار من دكتورنا الشاب الجميل حاولت بأكتر من طريقة حل الموضوع معاهم بشكل ودي، وكنا عارفين إن الموضوع لو وصل لماركوس راشفورد هيتحل، لكن ما علينا».
وأكمل: «بفضل الله وكرمه الدكتور المصري أخد براءة من كل التهم من شهرين، ومعانا البراءة رسمية من النيابة وبإمضاء رئيس نيابة الاستئناف، أيوه.. من شهرين!، مش عارف إيه فتح الموضوع ده دلوقتي تاني وليه دلوقتي أصلا، بس كان لازم أوضحلكم منعاً للرغي الكتير، القانون أخد مجراه وخلصنا، والراجل عنده امتحانات ومحتاج يركز في كليته الصعبة ونتمنى ليه كل الخير».
وأتم: «الفايدة اللي عايزكم تطلعوا بيها في الموضوع ده إنكم متستهونوش أبدا ببعد المسافات وتخش تشتم أي شخصية عامة أو أسرته، سواء شخصية رياضية أو غير رياضية، هو بني آدم مهما كان والشتيمة هتهينه وهتجرحه، وأيا كان، أيا كان هو مين، مفيش شخص في العالم يستحق إنك تنضر بسببه، بالأخص لو أنت اللي بتهاجمه، خلي بالكم ومتستهونوش بالموضوع».
تعليقات الفيسبوك