منتخب مصر الأولمبي
كشف الإعلامي أحمد شوبير، حارس مرمى النادي الأهلي ومنتخب مصر الأسبق، كواليس الساعات الأخيرة لأزمة الثلاثي فوق السن المقرر انضمامهم لقائمة المنتخب الأولمبي في أولمبياد باريس 2024.
وقال في برنامجه «مع شوبير»، عبر «أون سبورت إف إم»: «زي ما قلنا قبل كده إن المنتخب الأولمبي طلب محمد عبد المنعم وإمام عاشور من الأهلي، وقالوا للأهلي لو مش موافقين على عبد المنعم، ناخد ياسر إبراهيم مكانه مفيش مشكلة.. وطلبوا من بيراميدز ضم مصطفى فتحي».
وتابع شوبير: «قلتلكم برضوا إن زيزو أول المنضمين خلاص.. ظروف الزمالك تحسم، واللاعب حابب أنه يكون موجود، وبصراحة أنا شايف إن ده تتويج لمجهود زيزو الرائع، ولاعب يستحق كل خير، بعد ما فشلنا في الوصول لكأس العالم قدام السنغال».
أحمد سيد زيزو لاعب نادي الزمالك
وأضاف شوبير: «أنا بتكلم (فير) دايما والناس بتزعل مني، وبصراحة مبقيتش عارف أقول إيه، وبصراحة مش عارف برضوا ميكالي يعمل إيه.. هناك بيانات كتيرة من امبارح، منها بيان بيراميدز اللي أكد على لسان هاني سعيد المدير الرياضى، بأن ناديه لا يمانع في ضم أى لاعب، لكن اتحاد الكرة رافض إنه ينسق معاهم بشأن تأخير انضمام إبراهيم عادل».
وواصل شوبير: «لو قلت إن بيراميدز موقفه صح هيتهموني بمجاملة الرابطة، ولو قلت إن بيراميدز غلط هيتهموني بمجاملة الأهلي، ولو قلت إن الأهلي غلط بعدم إرسال كريم الدبيس وحمزة علاء وأحمد نبيل كوكا هيتهموني إني بهاجم الأهلي، وبصراحة الموضوع رخم وزايد عن حده ومش عارف أقول إيه».
واختتم شوبير: «مش عارفين نحط جدول، ولا عارفين نودي اللاعبين للمنتخب، طب ميكالي يعمل إيه؟ لما إبراهيم عادل ومحمود صابر والدبيس وحمزة علاء هيكونوا أساسيين، وكان هيسند بـ عبد المنعم أو ياسر إبراهيم مثلا، ودول 6 لاعبين أساسيين، هل بعد كدا تتوقع نجاح المنتخب في الأولمبياد ولا ندي الأعذار من دلوقتي، وكل الناس أشادت بميكالى سلوكا ونظاما وانضباطا، وأتمنى أن تمر هذه الأزمة على خير».
تعليقات الفيسبوك