«مليش في التحوير».. «روقا» يرد على عبدالواحد السيد وأيمن عبدالعزيز بالمستندات

أخبار متعلقة

الزمالك يعلن فسخ عقد محمد أشرف روقا

رد فعل جوزيه جوميز على تمرد محمد أشرف روقا

محمد أشرف روقا يتلقى عروضا بالجملة للرحيل عن الزمالك

محمد أشرف روقا ينتظر قرار الزمالك قبل حسم مصيره

رد محمد أشرف روقا، لاعب حرس الحدود الحالي والزمالك السابق، على الانتقادات التي وُجهت له من قبل الثنائي عبدالواحد السيد مدير الكرة السابق بالفريق الأبيض، وأيمن عبدالعزيز نجم الفريق الأسبق، بعد تصريحات اللاعب القوية ضد القلعة البيضاء، وتسليطه الضوء على العديد من الأزمات خلال فترة تواجده بالنادي.

وكتب روقا عبر حسابه على «إنستجرام»: «أول مرة أكتب حاجة وأعلق على موضوع أنا قلته، أو أرد على حد وأذكره باسمه، وهنا كلامي لكابتن عبد الواحد السيد، حضرتك عارف إني بحبك إزاي وبحترمك إزاي، وده البند اللي في عقدي واللي حضرتك قلت إنه مش موجود، أو البند ميخصش الفسخ من طرف واحد».

كيف رد روقا على عبدالواحد السيد وأيمن عبدالعزيز؟

تابع روقا: «حضرتك بتقول المفترض إني شخص متربي، لا هو ده مش مفترض، أنا الحمد لله متربي ومتربي كويس جدًا، ومش مستني حد يقول ده متربي ولا لا، وحضرتك عارف إني مليش في الكدب والتحوير».

وأضاف: «أما الشخص التاني فهو كابتن أيمن عبد العزيز، حضرتك بتقول إني لما جيت لنادي الزمالك جيت النادي من لا شيء، أنا مش مشكلتي إن حضرتك متعرفش حاجة، أنا قبل ما أجي نادي الزمالك الحمد لله أنا معدي الـ100 ماتش، ربنا كرمني ولعبت منتخب أولمبي مع كابتن حسام البدري، ربنا كرمني روحت منتخب مصر مع كوبر، فأنا الحمد لله مروحتش نادي الزمالك من لا شيء».

وأكمل لاعب الزمالك السابق: «تاني حاجة أنا مبقدمش حجج زي ما بتقول مليش في الجو ده خالص، وأنت عارف أنا مين وابن مين، وأنا مش مستني إني أشوف الناس بتهاجم حد عشان أطلع أتكلم، أنت بتقول إني خدت فلوس 6 سنين مجتش من سنة، لا هو حضرتك متعرفش حاجة برده وبتتكلم بس، ومتعرفش إني كنت بقعد فترة بـ5 و6 شهور ميدخلش بيتي جنيه».

واختتم: «أما بالنسبة لحوار جوميز فأنا مش محتاج أتحجج، ربنا بس وحده اللي يعلم إذا كنت بكدب أو صادق، فأنت متطلعش تقول أي كلام فارغ عني وأنت متعرفش حاجة، وركز في شغلك بدل ما أنت كل فرقة بتمسكها بتفشل، وبعد كده تمشي».