الزمالك لا يريد الخروج من الكونفدرالية.. ماذا قال معتمد جمال قبل لقاء شباب بلوزداد؟

أخبار متعلقة

كيف يفكر معتمد جمال قبل مواجهة شباب بلوزداد في الكونفدرالية؟

تشكيل الزمالك المتوقع أمام شباب بلوزداد في الكونفدرالية

قناة مفتوحة تعلن إذاعة مباراة الزمالك وشباب بلوزداد في الكونفدرالية «مجانا»

إيشو: درسنا شباب بلوزداد.. وهدفنا تأهل الزمالك لنهائي الكونفدرالية

تحدث معتمد جمال المدير الفني لنادي الزمالك، عن مباراة شباب بلوزداد الجزائري، المقرر لها غدا الجمعة، ضمن منافسات ذهاب الدور نصف النهائي من بطولة كأس الكونفدرالية الأفريقية للموسم الجاري 2025-2026.

معتمد جمال: ضغوط الزمالك زودت دوافعنا

وقال معتمد جمال في تصريحات خلال المؤتمر الصحفي: «مواجهة شباب بلوزداد مهمة وصعبة علينا وعلى المنافس، وإحنا عارفين كويس إن الماتش عبارة عن شوطين، الأول في الجزائر وهدفنا نطلع بنتيجة إيجابية تساعدنا في ماتش العودة في القاهرة عشان نوصل للنهائي».

وأضاف: «إحنا مدركين إننا هنواجه فريق قوي ومش واصل لنص النهائي بالصدفة، وهم أكيد تابعوا ماتشاتنا زي ما إحنا تابعناهم كويس جدا».

وتابع: «هنلعب قدام فريق عنده جماهير كبيرة وقوة، لكن إحنا كمان عندنا خبرات ولاعيبة متعودة على المواقف دي وعارفة تتعامل معاها».

وواصل: «الضغوط اللي مر بيها الزمالك الفترة اللي فاتت زودت دوافعنا، وإحنا الفريق المصري الوحيد في أفريقيا ومش عايزين نخرج من البطولة وهدفنا نكسب اللقب».

واستمر: «قبل كده صفوفنا مكنتش مكتملة بسبب الإصابات والغيابات، لكن دلوقتي دي أول مرة الفريق يبقى جاهز بالكامل وكل اللعيبة جاهزة بدنيا وفنيا وعايزة تقدم أقصى حاجة عندها».

وأشار: «الزمالك من الفرق اللي بتسجل كتير في الدوري والكونفدرالية، وماشيين بشكل ثابت، وعارفين إن ماتشات نص النهائي صعب التعويض فيها ومش زي دور المجموعات، وعندنا هدف واضح بنسعى له».

وأردف: «شباب بلوزداد فريق متوازن، وتغيير جهازه الفني ممكن يكون دافع ليهم، وإحنا درسناهم كويس جدا، وبصراحة الفريقين بقوا كتاب مفتوح لبعض، وإحنا داخلين نلعب على البطولة وإن شاء الله نقدم ماتش كويس».

وأكد: «عارفين أهمية الماتش قدام فريق قوي وعلى ملعبه ووسط جماهيره وعنده عناصر مميزة، لكن عندي ثقة كبيرة في لعيبتي إنهم يحققوا المطلوب، إحنا مش بنخاف من حد لكن بنحترم المنافس ومستعدين كويس».

واختتم: «عندنا 3 حراس مرمى دوليين، ومفيش أي مشكلة خالص في المركز ده».

موعد مباراة الزمالك وشباب بلوزداد في الكونفدرالية

يحل الزمالك ضيفا على شباب بلوزداد، في تمام التاسعة مساءً «بتوقيت القاهرة»، على على ستاد «نيلسون مانديلا» بالجزائر.

بينما تقام مباراة الإياب بين الفريقين يوم 17 أبريل الجاري، في تمام السادسة مساءً «بتوقيت القاهرة»، على ستاد القاهرة الدولي.