مصطفى شوبير
أكد مصطفى شوبير، حارس مرمى الأهلي، أن الاحتراف الخارجي يظل حلمًا مشروعًا لأي لاعب كرة قدم، لكنه شدد على أن أي خطوة في هذا الاتجاه لن تتم إلا بالتنسيق الكامل مع إدارة النادي الأهلي.
وقال مصطفى شوبير: «الاحتراف حلم لأي لاعب في العالم، ولو سألت أي حد هيرد إنه نفسه يحترف، وده شيء طبيعي، لكن في النهاية فيه عقد بيني وبين النادي، وفيه علاقة كبيرة ممتدة من وأنا عندي 6 سنين، من فرع مدينة نصر لحد الجزيرة، وأنا بحب الأهلي جدًا».
وأضاف: «لو وصلني عرض احتراف مميز، فالكلام كله هيكون عن طريق النادي، وبعدها هنشوف وجهة نظر الأهلي، هل مرحب بالعرض ولا لأ، مينفعش أتمنى حاجة وأنا معرفش الطرف التاني بيفكر إزاي، وحتى أنا وقتها ممكن يكون ليا تفكير مختلف، اللي واثق منه إن الخير هو اللي هيحصل، وأيًا كان القرار هكون متفهمه».
وأوضح حارس الأهلي أنه طوال مشواره داخل النادي لم يتسبب في أي أزمات تتعلق بالمشاركة أو العقود، قائلًا: «على مدار السنين اللي فاتت محدش سمع عني أي مشكلة، سواء بسبب اللعب أو العقود، اتقال إني جددت عقدي 3 مرات، وده محصلش، واتقال كمان إني ضغطت على النادي بعروض احتراف، وكل ده غير صحيح، أنا كل تركيزي إني أتمرن وأعمل اللي عليا، وربنا بيكرم الواحد في الوقت المناسب».
وكشف مصطفى شوبير أن آخر عقد وقعه مع الأهلي كان في عام 2021، وينتهي بنهاية الموسم المقبل، مضيفًا: «آخر تجديد عقد ليا كان في 2021، والعقد بينتهي السنة الجاية، وعرفت قيمة المرتب بعد ما مضيت على العقد».
تعليقات الفيسبوك