حمدي فتحي
قال حمدي فتحي لاعب وسط منتخب مصر، إن لقاء نيوزيلندا في دور المجموعات من كأس العالم كان الأصعب بالنسبة للفراعنة في البطولة بسبب التأخر في النتيجة.
وقال حمدي فتحي في تصريحات تليفزيونية: «إحساس إنك تبقى ضمن قائمة منتخب مصر في كأس العالم ميتوصفش، ده كان حلم حياتي، والحمد لله حققته، وسعيد جدًا إني لعبت في المونديال، والجيل ده من أحسن الأجيال اللي اتعاملت معاها، وأفضل معسكرين شاركت فيهم كانوا كأس الأمم الأفريقية وكأس العالم».
وتابع: «كلنا ساعدنا بعض جدًا عشان نوصل للمرحلة دي، وكان عندنا حماس كبير من أول يوم، وكنا مستنيين أول ماتش في كأس العالم بفارغ الصبر وكان علينا ضغط، لكنه ضغط إيجابي لأننا بنمثل اسم مصر، وكان لازم نقدم كل اللي عندنا عشان نفرح الجماهير، وكان نفسنا نحقق إنجاز للمنتخب».
وأكمل: «الجماهير في مصر كانت دافع كبير جدًا لينا، وكنت بشوف فرحة الناس على السوشيال ميديا، ومشوفتش الفرحة دي من وقت ماتش الكونغو في تصفيات كأس العالم 2018 وهدفنا مكانش مجرد المشاركة في كأس العالم، إحنا كنا عايزين نحقق حاجة تتكتب في التاريخ، وأعتقد إننا عملنا كده وكنا واثقين إننا هنكسب أستراليا، وكنا نقدر نكسب 3-0 لأننا كنا الأخطر وضيعنا فرص كتير، وكان عندنا يقين إننا هنحسمها بركلات الترجيح».
وأردف: «أصعب ماتش بالنسبة لنا كان قدام نيوزيلندا لأننا استقبلنا هدف بدري، وده حط علينا ضغط شوية».
واختتم: «وقت الهدف اللي اتلغى قدام الأرجنتين، كنا حاسين إنه هيتحسب وهيعدي والهدف التالت للأرجنتين غير صحيح، وليا ضربة جزاء صحيحة مليون في المية، وكانت واضحة جدًا، وأنا شوفت للحكم نفسه حالة مشابهة في أوروبا واحتسبها والخسارة كانت صدمة كبيرة لينا كلنا، ومكناش مصدقين اللي حصل».
تعليقات الفيسبوك