صلاح محسن مهاجم الأهلي
أكد صلاح محسن، مهاجم الفريق الأول لكرة القدم بالنادي الأهلي، أنه يعيش أفضل لحظات حياته داخل القلعة الحمراء، مؤكدًا أنه دائمًا ينتظر الفرصة من أجل إثبات نفسه أمام جماهير النادي.
وقال صلاح محسن، في مداخلة مع الإعلامي سيف زاهر، عبر قناة أون سبورت: "معنديش أي مشكلة مع النادي الأهلي في الجلوس على الدكة، المهم أن نسير بشكل جيد، والحمد لله لما أخدت الفرصة عملت اللي عليا، ومستني أي فرصة مرة أخري ومقدرش أفرط في حاجة زي كدا مع النادي".
وتابع: "صفقة انتقالي للأهلي هي الأغلى في مصر، وأنا مليش ذنب فيها خالص، وتعبتني فترة، بس اللاعب اللي عنده موهبة لازم يفكر في مستقبله، ومستني الفرصة لإثبات نفسي، وإن شاء الله الفترة المقبلة أقدر أقدم حاجة كبيرة للنادي الأهلي".
وأضاف: "أنا برتاح طبعا في مركز المهاجم الصريح، أنا في إنبي كنت بلعب مهاجم وساعات جناح، لكن مركز المهاجم هو الأكثر راحة بالنسبة لي، ومعنديش مشكلة ألعب جناح ولعبتها مع كابتن حسام البدري في الأهلي، ودلوقتي مع مستر فايلر بلعب جناح، والراجل واثق فيا وقالي أنت موهوب وهيشتغل معايا ومن هنا كمان لا برة، وقالي لازم لما تشارك تكون جاهز، وأنا قولتله أنا معاك في أي وقت، وده اللى بشتغل عليه الفترة المقبلة".
ومدح مهاجم المنتخب الأوليمبي النادي الأهلي، قائلًا: "أنا مشوفتش نادي زي الأهلي، في تعاملات وجمهور وبطولات، ودايمًا مطالب أن تظهر بشكل متميز، عندك بطولة خلصتها لازم تركز في اللى بعدها، الفرحة في الأهلي تكون بعد نهاية كل البطولات، ودايمًا مطالبين بالبطولة الأكبر وهي بطولة أفريقيا".
ووجه رسالة إلى مؤمن زكريا ومحمد محمود، بسبب الإصابة التي يتعرض لها الثنائي، قائلًا: "مؤمن من اللاعيبة اللى بحبهم على المستوي الشخصي، وفي الكرة محدش يقدر يوصفه وسيعود أفضل مما كان، ومحمد محمود لاعيب خيالي، موهوب زي الكتاب ما بيقول، وهو مختلف عن الأخرين، وإن شاء الله سيعود أفضل".
وأنهى حديثه قائلًا: "مركزين في المنتخب الأوليمبي، وإن شاء الله نقدر نقدم حاجة لمصر ولينا، وربنا يكرمنا بالبطولة، وكل اللاعبين في كامل تركيزهم، والكابتن حسام من الشخصيات اللى بحبها، وكل واحد بمجهوده ربنا شايله حاجة كويسة".
تعليقات الفيسبوك