أحمد حسن كوكا
كتب أحمد حسن كوكا، النجم المصرى المحترف فى صفوف أولمبياكوس اليوناني، رسالة نعي إلى والده وذلك عبر حسابه الشخصي على موقع التواصل الاجتماعي "إنستجرام".
ونشر "كوكا" صورته مع والده وعلق عليها: "يمكن اللي هقوله ده ناس قليلة تعرفه عشان أنا مش بحب اتكلم في حياتي الشخصية، بس أنا والدي من غيره أنا مش حاجة ولا عمري كنت هبقي حاجة ولا أحقق أي حاجة، بابا الله يرحمه من وأنا عندي 6 سنين وداني النادي الأهلي، كان أكبر حلم له إني أطلع لعيب كورة ويفتخر بي قدام أهله وصحابه، وعلي طول معايا في التمارين والماتشات ولما يكون عنده شغل وما يعرفش يحضر بيخلي حد يصور الماتش عشان يتفرج عليا بعد كدة، أيوة حبه لي وإنه يشوفني بلعب كورة كان حاجه تانية".
وعن موقف والده من الاحتراف، أوضح كوكا: "كبرت وجالي عرض احتراف وهو على طول في ضهري، قال لي قبل ما أسافر كلمتين مش هنساهم لآخر يوم في حياتي (عايزك ماترجعش مصر غير وأنت مشرفني برة، عايز افتخر بيك وسط أهلي)، قلت له إن شاء الله يا بابا، سافرت وفي أول شهر نزلت التمرين ولما رجعت كان في مطافي وبوليس كتير عند بيتي، فبصيت لقيت شقتي كلها بتتحرق، كل حاجة كانت عندي في الشقة راحت، كلمت بابا وقلت له أنا عايز أرجع مش قادر على الغربة واللغة صعبة، وبعد اللي حصل دة يمكن ربنا مش رايد إني أكمل هنا، قال لي أنا بكرة الصبح هجيلك".
وتابع: "بابا تاني يوم كان عندي وجايب لي لبس جديد كتير واداني فلوس عشان أجيب اللي عايزه، وقال لي أنا جيت عشان أفكرك اإنك مش هترجع غير لما تشرفني وتشرف بلدك، انت فاكر إنها سهلة؟ اللي حصل دة يقويك مش يخليك تستسلم، الحمد لله على كل حاجة بس أنا من غير والدي ماكنتش كملت، الله يرحمك يا أطيب وأحن وأرجل إنسان شوفته في حياتي، كان نفسي تبقي معايا وتفرح بيا، إن شاء الله نتجمع تاني في الجنة".
وأعلن "كوكا" خبر وفاة والده يوم 21 أكتوبر من عام 2015.
تعليقات الفيسبوك