"استحمل وموقفتوش جنبي".. حرب كلامية بين جنش وأمير مرتضى على "إنستجرام"
04:39 م | الجمعة 04 أكتوبر 2019
أمير مرتضى المشرف العام على الكرة بالزمالك
رد أمير مرتضى المشرف العام على الكرة بنادي الزمالك، على تصريحات محمود عبد الرحيم جنش حارس مرمى الفريق المصاب، والتي تساءل فيها عن سبب عدم صرف مقدم تعاقده.
وكتب أمير مرتضى، ردا على حساب جنش على انستجرام: "أحب أرد عليك قدام الناس علشان حقك وحقهم يعرفوا لأنك سألتني قبل كدة ورديت عليك بيني وبينك، لما جيتلك البيت ورغم إن نظام الفريق منع الكلام في الإعلام والسوشيال ميديا بس هرد عليك، لا السبب مش إصابتك طبعاً يا كابتن.. تقدر تسأل كل زمايلك في الفريق على مقدم الموسم الجديد حصلوا عليه ولا لأ !!، جميع اللاعيبن بإستثناء اتنين لاعيبة فقط هما اللي حصلو على المقدم علشان كان عندهم ظروف طارئة".
وأضاف: "يعني مثلاً فرجاني وبوطيب وطارق حامد ومحمود علاء والونش ومحمد حسن وزيزو وعمر السعيد وعبدالله جمعة وأوباما وغيرهم لسة مخدوش مقدم الموسم الجديد، أما بالنسبة للاعيبة الجديدة(الصفقات) فالطبيعي إنه يقبض المقدم مع التوقيع، وفي برضه ناس لسة مقبضتش وقالوا مفيش مشكلة نقبض مع زمايلنا، بما إنك سألت عن السبب قدام الناس فأحب أقولك إن الشركة الراعية متأخرة في دفع مستحقات كل الأندية، حتى المقاصة كانت مش هتذيع الماتش بسبب مستحقاتهم، تقدر برضه تسأل زمايلك في أندية تانية باستثناء بيراميدز".
المشرف العام على الكرة بالزمالك يرد بقوة على جنش
وواصل المشرف على الكرة بالزمالك رده على جنش قائلا: "عقود الرعاية والبث التلفزيوني هي 90% من موارد النادي، كان ممكن نبيع طارق حامد أو محمود علاء أو فرجاني وندخل فلوس كتير النادي، وساعتها مكانش هيكون في أزمة سيولة بس ده كان ضد مصلحة الفريق، كان ممكن منشتريش عواد وأبو جبل وأوناجم وبن شرقي بالمبالغ دي ونجيب بدايل أرخص ونوفر برضه فلوس".
واستكمل: "بالإضافة لمديونيات أكتر من 5 مليون دولار على الزمالك اتدفعوا كلهم السنة دي ومشاكل مع الفيفا عقوبتها خصم نقاط ووقف شراء وبيع لاعيبة لمدة 3 مواسم في حالة عدم السداد، أخرها كان من يومين، عالعموم انت من كباتن الفريق والمفترض إنك تستحمل زي ما زمايلك مستحملين إيه المشكلة فلوس تتأخر كام يوم!!، زي ما الموسم اللي فات كنتوا بتاخدوا 4 و5 أضعاف المكافأت، بتمنالك الشفاء".
جنش يرد مجددا على أمير مرتضى
وعاد جنش، ورد على تصريحات أمير مرتضى وقال: "أنا برده هرد على حضرتك لأن أنا عندي ظروف ووكيلي كلمك وخلتني ألف عليك كتير، وفي الآخر أنت كلمت وكيلي قولته اديله 150 ألف جنيه من معاك مع العلم أن أنا عقدي مش كبير زي اللاعبين اللي قلت عليهم وأنا من أكتر اللاعبين اللي استحملت ظروف النادي والمفروض لما اتصاب تكونوا واقفين جنبي".
ويغيب جنش عن الملاعب بسبب إصابة بقطع في وتر إكيليس، تعرض لها خلال وجوده مع منتخب مصر، ببطولة أمم أفريقيا الأخيرة، والتي استضافتها مصر خلال الفترة من 21 يونيو وحتى 19 يوليو الماضي.
تعليقات الفيسبوك