أمير مرتضى: مصطفى فتحي رفض تجديد عقده مع الزمالك وبن شرقي معملش مشاكل
07:55 ص | الأحد 23 يناير 2022
مصطفى فتحي لاعب الزمالك
كشف أمير مرتضى، المشرف العام على الكرة بنادي الزمالك، كواليس فشل صفقة انتقال مصطفى فتحي نجم الفريق الأبيض لصفوف نادي التعاون السعودي، خلال سوق الانتقالات الشتوية في شهر يناير الجاري، وموقفه من تجديد عقده مع القلعة البيضاء، كما تطرق للحديث عن ملف تجديد عقد المغربي أشرف بن شرقي، وأوضح أسباب غياب طارق حامد عن المشاركة مع النادي في الفترة الأخيرة.
أمير مرتضى: إحنا مش طرف في أزمة مصطفى فتحي وأوقفنا التفاوض معه
وقال أمير مرتضى، المشرف العام على الكرة بنادي الزمالك، في تصريحات تليفزيونية لقناة «أون تايم سبورتس»: «الزمالك مش طرف في أزمة مصطفى فتحي، هو طلب يمشي والنادي مش بيقف على حد، وعرضنا الأمر على المجلس والجهاز الفني، وتفاوضنا مع نادي التعاون السعودي حتى توصلنا لاتفاق قيمته مليون دولار».
وأضاف: «مفيش حاجة اسمها صفقة سرية، إننا نعلن عن قيمة الصفقة لازم نوضح إننا بعنا اللاعب ولازم نوضح قيمة الصفقة، لأن عرض التعاون مكنش فيه إن التفاوض يبقى سري، إحنا رفعنا الضغط عن مصطفى فتحي ووقفنا التفاوض معاه، وعندنا هدف التجديد لبعض اللاعبين».
أمير مرتضى: مش هنجدد لأي لاعب عشان الجمهور بيحبه.. وغياب طارق حامد بسبب الإصابة
وأكمل: «الزمالك اسم كبير مينفعش يبقى قاعد مستني لاعب يجدد ولا لأ، وده ينطبق على أي لاعب، في عرض بنحطه قدام اللاعب لو مش موافق خلاص مش هنجدد للاعب عشان الجمهور بيحبه، إحنا هنجدد للي هيبقى مُفيد للفريق وتتناسب طريقته معانا، طارق حامد لاعب محترم وعمره ما عمل مشكلة على عقد وأخد كدمة قوية في ركبته وأول ما يجهز هيلعب».
طارق حامد نجم الزمالك
وواصل: «أشرف بن شرقي لاعب ملتزم ومعملش مشاكل خالص، أنا لسة متكلمتش معاه في التجديد، لأنه مش طبيعي هكلم لاعب في تجديد وهو له حوالي 50% من عقده متأخرين، نزلنا جزء كبير هو وكام لاعب تاني ودفعنا 35 مليون جنيه الأيام اللي فاتت مستحقات للاعبين».
تعليقات الفيسبوك