عبر أشرف عبدالعزيز، والد فريال أشرف بطلة ذهبية أولمبياد طوكيو 2020، عن فرحته بحصول ابنته على ذهبية الكاراتيه بالدورة الأولمبية، قائلا: «صناعة البطل كلمة كبيرة، بتقعد سنين عشان تجيب ميدالية أو تشترك في بطولة وتجيب مركز، واللي بيوصل للأولمبياد بطل».
وأضاف «عبدالعزيز»، خلال اتصال هاتفي ببرنامج «حضرة المواطن»، المذاع على شاشة قناة «الحدث اليوم»، ويقدمه الإعلامي سيد علي، اليوم السبت، أن ابنته لديها مصابرة وإيمان بما تقدمه: «الحمد لله ربنا حقق لها اللي كانت بتطمح له من فترة».
وعن فرحة عائلة فريال أشرف بفوزها بالذهبية، قال: «إحنا مطبقين من امبارح ومنمناش، وده بسبب فرق التوقيت بينا وبين اليابان، وكنا على أعصابنا عشان تحقق لنا حاجة كويسة، بس الحمد لله تعبها مرحش هباء، وربنا كافئها بحاجة كويسة عشان قلبها أبيض ولما بتعمل حاجة بتخلص لها».
وتابع: «مامتها معاها في كل التدريبات، وبتعرف تقرأ أفكارها، وبتحاول تبعد عنها كل الحاجات اللي بتضايقها، والمدربين أدوا السنتين اللي فاتوا كل اللي عليهم».
وعن كيفية صناعة البطل، قال والد البطلة فريال أشرف: «للأسف عندنا في مصر مفيش الثقافة اللي تخلينا نعمل بطل إلا بتضافر جهود كتيرة أوي، وممكن الدعم المادي يقف، الألعاب الفردية مش واخدة حقها خالص مقارنة بالألعاب الجماعية، لازم يكون فيه اهتمام أكبر للألعاب الفردية».
وأكد أنه كان يتوقع حصول ابنته على ميدالية أولمبية: «الحمد لله ثقتنا في فريال كبيرة جدا، وكل البطولات اللي شاركت فيها دايما في المقدمة، كانت بتطلع أول أو تاني أو تالت».
تعليقات الفيسبوك