شوبير لمن يتمنى خسارة الأهلي أمام كايزر تشيفز: «بلاش تدبح نفسك»
12:36 ص | الجمعة 16 يوليو 2021
أحمد شوبير
رد الإعلامي أحمد شوبير نجم النادي الأهلي السابق، على بعض اللاعبين الذين ظهروا عبر الشاشات وتمنوا بوضوح خسارة الفريق الأحمر أمام كايزر تشيفز الجنوب أفريقي، غدًا في نهائي دوري أبطال أفريقيا.
وقال شوبير خلال حديثه ببرنامج «ملعب أون تايم» عبر قناة أون تايم سبورت: «مع احترامي للبعض اللي هيدبح نفسه لو الأهلي خسر احنا مش عايزينك تدبح نفسك بالعكس عايزينك عايش وتكون تمام ومحتاجينك ومحتاجين كل شخص، ونفسي كل شخص يرى أن فوز اللأهلي ببطولة قارية أو الزمالك بيوجعه خلي الوجع جواك بلاش تعلنه، لأنك لما تطلع بتثير عطف الناس مش غضب لأن مفيش حد بيغضب منك خالص لأنك هتسأل عن قواك العقلية، شايف لو عايز الأهلي يخسر أو الزمالك، حقك بينك وبين نفسك».
شوبير يوجه رسالة لمن يتمنى خسارة الأهلي أمام كايزر تشيفز
وأضاف: «أنا واضح بنسبة 100% بكون عايز الأهلي والزمالك يفوزوا دائما ببطولة قارية، كلنا هنشجع الأهلي، مش هتشجع اسكت هتكون فرحان لما الأهلي يدخل فيه هدف اقعد وسط جماعة زيك واتنطط لما الأهلي يدخل فيه جول، بس بإذن الله الأهلي هيسعد الأغلبية العظمة الأسوياء».
وتابع شوبير: «الناس العقلاء اللي فاهمين معنى الرياضة، كل القلوب مع الأهلي لتحقيق العاشرة لا بد أن نتحدث بفخر عن الأهلي والذي يمثل مصر».
وكان شوقي السعيد لاعب الزمالك السابق أكد في تصريحات تليفزيونية أمس، أنه يتمنى خسارة النادي الأهلي أمام كايزر تشيفز يوم السبت المقبل قائلًا: «أنا بشجع أي فريق أفريقي ضد النادي الأهلي ومبحبش نهائي إنه يفوز لأنه ينافس الزمالك المنافس المباشر، إزاي أكون فرحان لفوزه ومحدش يتكلم معايا في وطنية لأنه مش منتخب مصر».
تعليقات الفيسبوك